Një aeroplan që fluturonte nga Casablanca të Marokut drejt Istanbulit të Türkiye-s mëngjesin e sotëm ka bërë një ulje emergjente në Barcelonë, pas çka 28 pasagjerë shfrytëzuan mundësinë për të ikur ilegalisht në Spanjë.
Sipas të përditshmes spanjolle ‘El Pais’, autoritetet thanë se ende janë në kërkim të 14 pasagjerëve që arritën të ikin, ndërsa të tjerët u kapën ose vendosën të kthehen në aeroport.
Aeroplani bëri ulje emergjente pasi një grua shtatzënë u shfaq se duhej të fillonte lindjen. Autoritetet e dërguan me urgjencë në një spital në Barcelonë për të lindur, por mjekët shpejt zbuluan se ajo nuk ishte në lindje.
Sipas ‘El Pais’, gruaja është arrestuar për çrregullim publik.
Një incident i ngjashëm ndodhi edhe në nëntor të vitit të kaluar kur një burrë pretendoi se ka hyrë në koma diabetike në një fluturim tjetër nga Maroku në Türkiye.
Ai aeroplan bëri një ulje emergjente në Mallorca dhe mbi 20 pasagjerë u larguan me shpejtësi nga aeroplani.
Ata u kapën përfundimisht dhe po përballen me akuza të rënda, përfshirë për rebelim.
Javën e kaluar, një tjetër emigrant bëri një përpjekje për të kaluar në Spanjë, duke përdorur një parashutë për t’u ngjitur mbi gardhin kufitar që ndan Spanjën dhe Marokun.
Përditësimi i fundit i policisë tha se autoritetet spanjolle akoma nuk e kanë kapur individin që qëndron pas këtij marifeti.
