Malta ka hapur konsullatë në Kosovë dhe Remzi Ejupi nga tani është Konsull Nderi i këtij shtetit, emërimi i tij është bërë mbrëmë në Prishtinë, nga ambasadorja jo rezidente e Maltës në Kosovë, Scerri Ferrante.
Në njoftimin e lëshuar thuhet se në këtë ceremoni morën pjesë shumë figura të njohura politike, diplomatë vendor dhe të huaj si dhe mysafirë special që kishin ardhur nga Malta.
I sapo emëruari në këtë pozitë është shprehur i nderuar me pozitën që ka marrë, ndërsa është zotuar se do të rris bashkëpunimin në tregti, ekonomi, kulturë dhe turizëm mes Maltës dhe Kosovës.
“Do të bëj maksimumin që të hap dyert për pronarët e bizneseve dhe të referoj interesin tregtar me ndihmën e subjekteve, si Oda Ekonomike e Kosovës dhe Shoqatat Tregtare, si STIKK dhe ICK, ku jam i informuar se kompanitë kosovare tashmë kanë marrë pjesë në takimet B2B dhe në forumin e biznesit në Maltë këtë vit, organizuar nga Dhoma e Tregtisë së Maltës, pas propozimeve të Ambasadores së Maltës” , është shprehur Ejupi në ceremoni para të pranishmëve.
Ai gjithashtu përmendi edhe rritjen e bashkëpunimit në fushën e turizmit duke paralajmëruar një linjë të re direkte Prishtinë – Valleta pas liberalizimit të vizave i cili pritet të hy në fuqi nga 1 janari 2024.
“Fluturimet direkte jo vetëm që do të rrisin turizmin, por edhe aktivitetet tregtare dhe ekonominë e të dy vendeve. Kjo do të çojë në mundësi tregtare midis të dy vendeve dhe në këtë mënyrë, do të rritet edhe bashkëpunimi i mëtejshëm nga pikëpamja e biznesit”, u shprehu ai.
