Një grua shtatzënë ka vdekur mbrëmë në oborrin e QKUK-së, pasi u vra me armë shurdhuese nga ish-bashkëshorti i saj, raporton KosovaPost.
Lidhur me rastin, ka pasur reagime të shumta nga figura publike të cilët kërkuan dënimin e merituar për dorasin.
Megjithatë, ende nuk dihet se cili do të jetë dënimi për Sokol Halilin, i cili privoi nga jeta ish-gruan, bashkë me fëmijën të cilin po e mbante në barkun e saj.
Avokati, Asdren Bytyqi tha se dënimi i merituar për personin i cili i merr jetën dikujt, si në rastin e mbrëmshëm është 10 vjet ose me burgim të përjetshëm.
“Në këtë rast kemi të bëjmë elemente të veprës penale “Vrasje e rëndë”, parashikuar me nenin 173 të Kodit Penal. Dënimi i paraparë për këtë vepër penale është minimum 10 vjet apo me burgim të përjetshëm. Konsideroj se në këtë rast konkret, duke pasur parasysh karakterin e viktimën, si grua shtatzënë, ka bazë juridike-penale që të shqiptohet dënimi me burgim të përjetshëm”, tha avokati për KosovaPost.
Ndryshe, kjo është vrasja e dytë e grave në një javë në Kosovë. Më 25 nëntor një burrë vrau gruan e tij në Prishtinë./KosovaPost/