Një prej nënkryetarëve të Lidhjes Demokratike të Kosovës, Gazmend Muhaxheri, ka treguar se nuk planifikon që të kandidojë për pozitën e kryetarit të partisë, tashmë kur po bëhen organizimet e fundit për mbajtjen e Kuvendit zgjedhor prej ku do të dal shefi i ri i partisë pas dorëheqjes së Isa Mustafës si rezultat i 14 shkurtit.
Lidhja Demokratike e Kosovës do të mblidhet sot në orën 16:30 ku do të bëhen diskutimet dhe përgatitjet për organizimin e Kuvendit zgjedhor prej ku do të dalin me shef të ri të partisë.Deri tani, ambicie për të udhëhequr me LDK-në pas debaklit të 14 shkurtit ka shprehur Anton Quni. Lutfi Haziri e ka lënë pezull çështjen e kandiditmit, derisa Gazmend Muhaxheri thotë se nuk do të kandidojë.“Jo nuk do të kandidojë”, u shpreh shkurtimisht Muhaxheri për gazetën express.Zgjedhjet e brendshme në LDK vijnë pas humbjes së thellë në zgjedhjet e 14 shkurtit, ku për herë të parë në histori që nga themelimi, partia e themeluar nga Ibrahim Rugova ka rënë në vetëm 100 mijë vota.
Si rezultat i kësaj, Isa Mustafa ka vendosur të japë dorëheqje, i cili në disa reagime të mëvonshme ka deklaruar se nuk e kupton se pse elektorati e ka ndëshkuar partinë e tij. Deri tani, si emra të mundshëm për të udhëhequr me LDK’në janë Lumir Abdixhiku, Lutfi Haziri e Kujtim Shala.
