Një deklaratë e deputetit Arben Gashi, nga radhët e Lidhjes Demokratike të Kosovës (LDK), ka përndezur opinionin publik këto ditë. Sipas tij, ish emisari amerikan Richard Grenell për çështjen e bisedimeve Kosovë – Serbi, pat kërkuar që LDK, ta rrëzonte Qeverinë Kurti I, transmeton Kosova Post.
Por kjo deklaratë e tij, po vijon të demantohet nga zëra të ndryshëm, figurash politike.
I fundit që e ka demantuar atë është ish shefi i tij, ish kryeministri dhe kryetari i LDK-së Isa Mustafa.
“Richard Grenell nuk ka kërkuar asnjëherë nga LDK, sa unë kam qenë Kryetar i saj, që të rrëzohet Qeveria Kurti 1. Nga askush nga SHBA, LDK s’ka marrë porosi të tilla dhe afate.
z. Grenell si përfaqësues i Presidentit të SHBA-ve për Kosovën (jo si emër i përveçëm) ka kërkuar nga ne që të hiqet tarifa e vënë nga Qeveria Haradinaj dhe që kjo tarifë të mos zëvendësohet me reciprocitetin, për ti dhënë shanse bashkëpunimit ekonomik në rajon dhe dialogut” – ka sqaruar Mustafa.
Ai më tutje ka sqaruar kësisoj situatën e atëhershme politike:
“I kam shkruar z. Kurtit në atë kohë se nëse nuk respektohen kërkesat amerikane për tarifat dhe nuk bashkëpunohet me SHBA-të si partner strategjik atëherë LDK, posa të kalojë faza e COVID-it, do të del nga Qeveria. Jo se do ta rrëzojë Qeverinë por DO TË DEL NGA QEVERIA KURTI. Qëndrimi në një Qeveri të tillë e cila nuk bashkëpunonte me SHBA-të ishte i pakuptimtë dhe degradues për LDK-në.”
Për më shumë, Mustafa i ka cilësuar si të çuditshme këto deklarata:
“Z. Kurti e rrëzoi vet Qeverinë me shkeljen e Marrëveshjes së koalicionit , kur e shkarkoi një ministër të LDK-së. Këtë e bëri me të vetmin qëllim për të krijuar shkas që të bie Qeveria.
Po habitem me mendjelehtësinë e interpretimit të 7 ditëve, pesë ditëve, e ditëve të trilluara dhe analizave që po iu bëhen në publik. Këta njerëz ose nuk i njohin SHBA-të ose janë të sëmurë kundër SHBA-ve. I falem zotit që jam gjallë dhe shëndosh nga mendja, për të mos lejuar spërkatje të tilla ndaj LDK-së dhe partneritetit me SHBA-të derisa unë isha kryetar i saj.”
Përndryshe për këtë çështje është pyetur edhe vet Grenell i cili e ka mohuar ta ketë bërë një presion të atillë ndaj LDK-së./KosovaPost/
