Dritan Abazoviq, kryeminstër i Malit të Zi, sot do të zhvillojë vizitë zyrtare në Beograd, transmeton Kosova Post.
Sipas paralajmërimeve të mediave malazeze dje, Abazoviq edhe me 11 të tjerë nga kabineti i tij, do të shkojë në Serbi, ndërsa sipas njoftimit ai do të takohet me presidentin serb, Aleksandër Vuçiq, kryeministren serbe Ana Brnabiq dhe kryeparlamentarin Ivica Daçiq, raporton Tanjug.
Për vizitën e Abazoviqit ka folur edhe presidenti serb, Aleksandër Vuçiq, i cili ka parashikuar që vizita të jetë e rëndësishme sikur edhe temat me rëndësi që do të diskutohen.
“Presim një vizitë të mirë, me Dritan Abazoviqin do të diskutojmë të gjitha temat e rëndësishme”, ka thënë Vuçiq.
Kryeministri i Malit të Zi do të qëndrojë dy ditë në Beograd.Ai është shqiptari i parë në krye të ekzekutivit malazez.
Prej se ka ardhur në pushtet Mali i Zi ka marrë rol në iniciativën “Ballkani i Hapur” si shtet monitorues.