Aktori amerikan Bill Cosby u shpall fajtor për sulm seksual ndaj një të miture. Kjo u vendos nga juria e gjyqit civil që përfundoi në Kaliforni. Judy Huth pretendoi se ai e kishte sulmuar seksualisht atë kur ishte adoleshente në vitet 1970.
Ajo ishte 16 vjeç në atë kohë dhe ngacmimi ndodhi në rezidencën Playboy të Hugh Hefner në 1975. Juria i dha asaj 500,000 dollarë dëmshpërblim.
Përmes avokatëve të tij, Cosby, 84 vjeç, ka mohuar të gjitha akuzat për sjellje të pahijshme seksuale.
Në ankesën e saj, Huth tregoi për takimin me Cosby në një park ku ai po xhironte një film. Pasi u miqësua me Huthin dhe një shoqe, Cosby dyshohet se i ftoi ato të bashkoheshin me të në klubin e tij të tenisit. Prej aty, pretendoi Huth, komediani i ftoi në një shtëpi ku u shërbeu të rejave pije të shumta alkoolike dhe më pas i çoi në rezidencën e Playboy. Huth pretendoi se megjithëse Cosby e dinte moshën e saj dhe të shoqes së saj, ai i udhëzoi adoleshentet “që nëse ndonjë prej lepurushëve të Playboy pyeste moshën e tyre, ato duhet të thoshin se ishin 19 vjeç”.
Huth më tej pretendoi se Cosby e çoi atë në një dhomë gjumi në rezidencë ku e ngacmoi seksualisht.
Pas vendimit ajo foli shkurtimisht me gazetarët jashtë gjykatës në Santa Monica. “U gëzova. Kanë kaluar kaq shumë vite, kaq shumë lot.”
Ky rast “dëshmon se mund të vraposh, por nuk mund të fshihesh”, tha avokati i saj.
Përmes avokatëve të tij, Cosby, 84 vjeç, ka mohuar të gjitha akuzat për sjellje të pahijshme seksuale.
“Ajo që ndodhi sot nuk ishte një fitore, sepse ata nuk morën dëmet ndëshkuese,” tha zëdhënësi i Cosby, Andrew Wyatt.
Cosby nuk ishte i pranishëm për gjyqin apo vendimin dhe ekipi i tij planifikon të paraqesë një apel.
Që nga viti 2005, më shumë se 50 gra janë paraqitur për të akuzuar Cosby për sulm seksual. Kjo është çështja e parë civile e Cosby që kalon në gjyq.
