Janë disa sfida që e kërcënojnë sigurinë në Kosovë. Njëra nga to është edhe retorika e dëmshme në baza etnike, e tjetra brengë ka të bëjë me papunësinë, veçanërisht pas rritjes së saj si rezultat i shpërthimit të pandemisë.
Këtë vlerësim për situatën aktuale të sigurisë në Kosovë e ka bërë admirali i NATO-s, amerikani Robert P. Burke, në një intervistë ekskluzive për Klan Kosova, me rastin e vizitës së tij të parë në Prishtinë si shef i Shtabit Qendror të Forcave të Përbashkëta Aleate në Napoli, nën përgjegjësinë e të cilit bie edhe KFOR-i.
“Në vitet e fundit në Kosovë është arritur shumë në lidhje me termat e sigurisë. Sidoqoftë, disa sfida mbesin, duke përfshirë, për shembull, ndikimin e krimit të organizuar, aktivitetet ilegale ekonomike dhe retorikën e dëmshme në baza etnike”, ka thënë ai.
“Papunësia është po ashtu një brengë, veçanërisht pas rritjes së saj si rezultat i shëprthimit të pandemisë”. Burke ka thënë se KFOR-i është plotësisht i vëmendshëm për këta faktorë të jostabilitetit dhe i monitoron ata përsëafërmi, duke qëndruan në mënyrë fleksibile në terren, dhe duke shkëmbyer informata me të gjithë partnerët për çështjet e sigurisë.
“Aktualisht nuk ka indikacione që situata e tashme e sigurisë do të ndryshojë për të keq. Në cilindo rast, ne mbesim vigjilentë”, ka thënë admirali i NATO-s.
Burke ka shtuar se “KFOR-i vazhdon të kontribuojë në ruajtjen e një ambienti të qetë dhe të sigurt, të lirisë së lëvizjes për të gjitha komunitetet në Kosovë, në bashkëpunim me institucionet e Kosovës”.
