Aktori amerikan Alec Baldwin i quajti “gënjeshtra” raportimet se ai nuk ka bashkëpunuar me forcat e sigurisë në hetimin e aksidentit fatal gjatë xhirimeve, ku mbeti i vrarë një person dhe një tjetër u plagos, transmeton Anadolu Agency (AA).
Në një video të postuar në llogarinë e tij në Instagram, Baldwin i mohoi akuzat se ai ende nuk ua ka dorëzuar telefonin autoriteteve pavarësisht urdhrit të kërkimit dhe se po i shmanget bashkëpunimit.
Ai tha se procesi ligjor mund të marrë një kohë të gjatë për të përcaktuar se çfarë kërkohet në hetim.
“Ata nuk mund të hyjnë në telefonin tuaj dhe të analizojnë fotografitë tuaja, letrat e dashurisë për bashkëshorten ose çfarëdo që keni”, u shpreh aktori amerikan.
Autoritetet mendojnë se mesazhet dhe videot në telefonin e Baldwin-it, të cilat ende nuk kanë mundur t’i ekzaminojnë pavarësisht urdhrit të kontrollit të lëshuar tri javë më parë, janë të rëndësishme për rrjedhën e hetimit.
Aktori Alec Baldwin vrau kineasten 42-vjeçare Halyna Hutchins me armën që përdori gjatë xhirimeve të filmit “Rust” në New Mexico më 21 tetor, ndërsa regjisori 48-vjeçar Joel Souza u plagos në shpatull në të njëjtin incident.
Më 19 nëntor, u ngrit një padi kundër aktorit Baldwin dhe producentëve të filmit. Në dosje pretendohej se Baldwin vendosi dhe shtiu qëllimisht me armën e mbushur, megjithëse “në skenarin e skenës që do të xhirohej, nuk kishte asnjë rrethanë që do të kërkonte përdorimin e armës”.
Në intervistën e tij të parë pas incidentit, Baldwin tha se nuk e dinte që kishte plumb të vërtetë në armë dhe se ndiente trishtim të thellë dhe keqardhje për atë që kishte ndodhur, por nuk ndihej fajtor.
