Anglia miratoi vaksinën ndaj koronavirus (Covid-19) të prodhuar nga kompania farmaceutike me bazë në Gjermani “BioNTech”, që një nga themeluesit e saj është edhe Prof. dr. Ugur Sahin dhe partnerit të saj amerikan, Pfizer, transmeton Kosova Post.
Sipas lajmit të “BBC”, Autoriteti Rregullator Britanik për Farmaceutikën i Mbretërisë së Bashkuar njoftoi se kandidati i vaksinës “BNT162b2” është i sigurt për përdorim të gjerë.
Kështu që Anglia u bë vendi i parë që miratoi një kandidat për vaksinë të prodhuar kundër Covid-19.
Pas miratimit, pritet që vaksinimi i grupeve me përparësi të lartë të fillojë në Angli prej javës së ardhshme.
Britania më parë kishte bërë një paramarrëveshje për blerjen e 40 milionë dozave të vaksinës në fjalë.
Kandidati i vaksinës me bazë Acidin Ribo Nukleik (mRNA) u bë vaksina e parë ndaj Covid-19 e regjistruar në botë.
Vaksina arriti të marrë aprovimin duke përfunduar studimet e zhvillimit klinik dhe provat klinike me 3 faza në më pak se 10 muaj.
“Pfizer” dhe “BioNTech” raportuan se kandidati i vaksinës ishte 95 për qind efektiv për imunitetin kundër virusit.
Kompanitë kishin aplikuar në Departamentin amerikan të Ushqimit dhe Barnave (FDA) dhe Agjencinë Evropiane të Barnave (EMA) për të lejuar që kandidati i vaksinës të përdoret menjëherë.
Kompanitë bënë marrëveshje me SHBA, Bashkimin Evropian (BE), Britaninë e Bashkuar, Kanadnë dhe Japoninë për furnizimin me vaksinë.
Ministri turk i Shëndetësisë Fahrettin Koca, më 25 nëntor kishte deklaruar se Turqia zhvillon bisedime për blerjen e 25 milionë dozave në muajt e dimrit, nga këto 1 milion në muajin dhjetor.
Kompania ka në plan të prodhojë 100 milion doza deri në fund të vitit 2020 dhe rreth 1.3 miliardë doza deri në fund të vitit 2021./trt.net
