Gazetat pro qeveritare serbe kritikuan pronarin e ri serb të ekipit anglez të Southampton, Dragan Šolak sepse “lejoi” lojtarin shqiptar të këtij ekipi Armando Broja të bëntë simbolin e flamurit me duar pas golit të realizuar ndaj Brentford dy ditë më parë, përcjell KosovaPost.
“Kur shqiptari shënoi një gol, ai e festoi me duar duke bërë shqiponjën dykrenore, simbolin famëkeq të “Shqipërisë së Madhe”, që futbollistët shqiptarë e praktikojnë prej shumë vitesh! Në minutën e 49-të, sulmuesi 20-vjeçar i Southampton shënoi për skuadrën e tij dhe vrapoi nëpër fushë me duar të kryqëzuara dhe shumë shpejt në ekran u shfaq pronari serb i “United Media”, i cili përshëndeti këtë gjest “jo sportiv” të të riut Broja me. duartrokitje ekstatike. Sholak, i ftohtë, përshëndeti simbolin e “Shqipërisë së Madhe”!” thekson gazeta serbe Republika e cila sulmon miliarderin serb që e lejoi këtë akt.
Ndeshja mes Southampton dhe Brentford në Premier League përfundoi me një fitore bindëse të klubit (4:1), i cili së fundi ishte në posedim të manjatit Sholak dhe gjatë gjithë ndeshjes pronari i “United Group” dhe “Sport Republic” ishte në humor të mirë, duke qeshur, piu kafe dhe duartrokiti duke marrë pjesë në duartrokitjet e tifozëve të zjarrtë të klubit anglez.
Kjo është arsyeja pse nuk është për t’u habitur që manjati mediatik Šolak i dha një mbështetje kaq të madhe lojtarit shqiptar Brojës.
Reagime pati edhe nga deputetja e Partisë Progresive Serbe Sandra Božić duke thënë:
“Besoj se po aq entuziast është edhe Djilas. Është e qartë se kjo dyshe manjatësh Sholak-Djilas është në të njëjtën linjë ideologjike dhe fitimprurëse me të gjithë armiqtë e Serbisë dhe se ata janë të bashkuar në sipërmarrjene tyre për të shkatërruar vendin tonë së bashku dhe se janë marrë vesh për çmimin e krahinës sonë jugore (Kosovës) shumë kohë më parë. Qytetarët, jam e sigurt se e shohin të gjithë këtë shumë qartë dhe kurrë nuk do të lejojnë dy hajdutë dhe përfitues të vendosin për fatin e Serbisë” deklaroi Božić për mediat në Beograd.
