Tregut të artistëve vazhdimisht po i shtohen talentë e talente të reja, me ide dhe krijimtari të veçantë të artit. E njëra ndër degët e saj që po zgjon interes për tu studiuar është piktura, që bën pjesë tek artet e bukura, raporton KosovaPost.
Albiona Berisha, një vajzë nga Kaçaniku, e cila aktualisht është studente në deparatamentin e arteve figurative ka dhënë një intervistë për KosovaPost, ku ka folur më shumë për një ëndërr të saj fëmijërore.
Berisha tutje ka folur për pikturën dhe për ekspozitat në të cilat ajo ka qenë pjesëmarrëse dhe se çka e bëri atë ta zgjedh pikërisht pikturën.
Gjithashtu ajo shpjegon se kur dhe si e ka zbulur talentin e saj. Për më shumë lexoni intervistën e plotë.
1. Na flisni pak për profilin tuaj.
-Unë jam Albiona Berisha nga komuna e Kaçanikut e lindur më 29 mars të vitit 2002. Për momentin jam studente në Fakultetin e Arteve të bukura, në departamentin e arteve figurative, më saktësisht në degën e pikturës. Si rrjedhojë e kësaj unë kryesisht merrem me artin e pikturës të cilin e konsiderojë si një nga artet më të larta dhe më sublime duke bërë kështu një krahasim me gjinitë tjera të artit. Shkollën e mesme e kam të përfunduar në shkencat natyrore në komunën e Kaçanikut, por kjo nuk më distancoi nga ajo lidhja që kisha unë me artin e të pikturuarit, përkundrazi, ajo më konstatoi diçka lidhur me këtë se ” ajo çfarë të bën një artist nuk janë ndjekja e shkollave të caktuara të artit, por artisti është duke fjetur brenda teje dhe ajo çka mbetet nga ti është ta zgjosh atë dhe ta sjellësh në jetë”. Një shembull shumë fundamental ne kemi piktorin e mirënjohur Francis Bacon, atë nuk e bëri artist një akademi e arteve, por ai e mësoi vetë këtë art dhe arriti të shprehte vetën në mënyrë të veçantë në këtë medium.
2. Kur dhe si e zbuluat talentin tuaj?
-Mendoj se arti ishte gjithmonë brenda meje, më duhej vetëm ta nxirrja jashtë e ta sillja në jetë e të më bëhej vetë jeta ime. Nuk mundem të konstatojë saktë kohën kur zbulova se diçka e madhe ishte duke u zier brenda meje, por një gjë e di me siguri se me artin e të pikturuarit jam marrur që nga mosha e hershme e fëmijërisë, madje këtë teori arrijë ta vërtetojë nga disa dokumentime të cilat prindërit i kanë ruajtur si një dëshmi e të vërtetës sime.
3. A keni marrë pjesë në ndonjë ekspozitë?
-Deri më tani, kam qenë pjesëmarrëse e shumë ekspozitave kolektive, të mbajtura në vende të ndryshme të Kosovës si në: Prishtinë, Ferizaj, Klinë, Suharekë.
4 A keni marrë pjesë në ndonjë ekspozitë, në trojet shqiptare Shqipëri, Maqedoni ?
-Në Maqedoni kisha mundësinë të ekspozoja një diptik si pjesë e shumë punëve tjera të ardhura nga Shqipëria, Kosova dhe nga vetë artistët e Maqedonisë, më saktësisht të qytetit të Tetovës. Ndërsa në Shqipëri jam pjesë e konkursit ndërkombëtarë të fotografisë i cili do të mbahet me datën 10 dhjetor të këtij viti në qytetin e bukur të Shkodrës. Kjo do të jetë një datë me rëndësi, sepse puna ime në mediumin e fotografisë do të jetë pjesëmarrëse në mesin e punëve nga fotografët më të mëdhenjë shqipëtarë.
5 A keni ndonjë mesazh për lexuesit e KosovaPost?
-“Ndjek rrugën për të cilën ke lindur ta ndjekësh”.