Avokati i Kadri Veselit ka thënë se e ka bërë një gabim gjatë deklaratës së tij në seancën e sotme dëgjimore në Dhomat e Specializuara në Hagë, kur ka thënë se Nazim Bllaca ka vdekur.
Në fund të seancës, ai ka thënë se do të sqarohet për këtë deklaratë por në transmetimin e gjykatës është dëgjuar vetëm një pjesë e fjalisë së tij.
“Bëra një gabim, thash Nazim Bllaca ka vdekur…”, ka thënë avokati Ben Emmerson.
Gjatë konferencës së sotme, avokati i Veselit kishte deklaruar se prokuroria vazhdon të mbështetet te një dëshmitar me emrin, Nazim Bllaca, i cili sipas tij ka vdekur.
Seanca e sotme ka pasur probleme teknike gjatë gjithë kohës, teksa transmetimi në faqen zyrtare të Dhomave të Specializuara ka filluar me një orë vonesë dhe ka pasur shkëputje të fjalive vazhdimisht.
Seancat e Dhomave të Specializuara të Kosovës në Hagë, transmetohen përmes një linku të veçantë të gjykatës 45 minuta më vonë sesa fillimi i seancës në sallën e gjyqit.
Avokati i Veselit: Prokuroria mbështet tek një dëshmitar që ka vdekur
Avokati i Kadri Veselit, Ben Emmerson gjatë seancës së sotme dëgjimore në Dhomat e Specializuara ka dhënë një lajm të padëgjuar më herët. Ai duke treguar për bashkëpunimin e Serbisë me Gjykatën Speciale, përmendi Nazim Bllacën për të cilin tha se ka vdekur.
“Ekzistojnë prova që shërbimet e Serbisë kanë tentuar të korruptojnë dëshminë e cila është paraqitur para Tribunalit të Hagës. Njëri nga dëshmitarët e ka pranuar, se dëshmia e tij ishte e rrejshme. Ky do të ishte një material që do ta diskreditonte çështjen e Prokurorisë, e cila vazhdon të mbështetet tek një dëshmitar, Nazim Bllaca, i cili ka vdekur. Kishte informata që ka qenë aset serb, i paguar nga Serbia”, theksoi Ben Emmerson.
Nazim Bllaca, i cili në vitin 2009 ishte paraqitur publikisht duke u vetë deklaruar si pjesëtar i Shërbimit Informativ të Kosovës (SHIK) dhe duke thënë se ka kryer vrasje për llogari të kësaj organizate. E ky deklarim i tij kishte bërë jehonë të madhe asokohe, teksa ishte marrë nën mbrojtjen e EULEX-it, si dëshmitar i mbrojtur, teksa mbi deklaratat dhe dëshmitë e tij ishin mbajtur disa procese gjyqësore nga EULEX-i, e ku ishin dënuar dhjetëra persona.
Ndërkaq, avokati i Thaçit në seancën e sotme foli për raportin e Dick Martyn.“Raportet dëshmojnë se një numër materialesh janë marrë nga Serbia e që janë shfrytëzuar nga Dick Marty. Është zbuluar përpjekja për të vrarë Dick Martyn. Autoritetet serbe nxorën një kontratë për vrasjen e Martyt për të fajësuar për këtë shqiptarët e Kosovës”, ka thënë Keohe, por i cili është ndërprerë nga gjykatësi me arsyetimin se kjo nuk është temë konkrete për materialet shfajësuese./rtk