Reshjet e fundit të borës janë bërë shkak që banorët në Fushë Kosovë të përballen me reduktime të mëdha të ujit të pijshëm. Nga Ujësjellësi “Prishtina” arsyetohen se kanë qenë të detyruar t`i aplikojnë reduktimet, për shkak të turbullirës së ujit që vjen nga Liqenin e Ujmanit.
Por në ndërmarrjen që menaxhon kanalin e ujit “Ibër-Lepenci” thonë vetëm fabrika në Prishtinë nuk po mund ta trajtojë ujin. Sipas tyre, të njëjtin ujë po e trajton Vushtrria dhe Mitrovica.
Skënder Bytyqi është një nga mijëra banorë të Fushë Kosovës, që thotë se po përballet me reduktime të ujit deri në 6 orë.
“Pa ujë nuk ka zgjidhje. Për banjë, pastrim, rrobat, është vështirë”, tha Skender Bytyqi, banor i Fushë Kosovës.
Edhe Ismet Hasani thotë për RTK se mungesa e ujit po u shkakton vështirësi.
“Në katin e 8 jemi. Edhe me ardh uji poshtë, ne as deri nesër nuk kemi. Kemi mbledh shishe e çka kemi mundur”, tha Hasani
Nga kjo situatë janë prekur edhe bizneset.
Nga Ujësjellësi “Prishtina” thonë se pas ngritjes së turbullirës në liqenin e Ujmanit dhe në kanalin e Ibër-Lepencit, janë detyruar të bëjnë reduktime të ujit.
Përgjegjës për këtë kanal është ndërmarrja Ibër-Lepenc.
Kryeshefi i Ibër-Lepencit, Faruk Mujku, thotë se me të njëjtin kanal furnizojnë edhe disa komuna të tjera, porse problem po ka vetëm Fushë Kosova.
“Fatkeqësisht këtë problem e kanë vetëm banorët e Fusë- Kosovës që furnizohen nga Fabrika e ujit në Shkabaj. Mendoj se përgjigjen më të saktë se pse kjo po ndodh vetëm në Fabrikën në Shkabaj, duhet me kërku atje. Prishtina furnizohet nga dy burime tjera, Badoc dhe Batllave dhe nuk e di nëse ata kanë probleme tëe njëjta edhe pse uji është me i turbullt si ky këtu. Ne po kryejmë punën me përgjegjësi dhe po investojmë në renovimin përgjatë kanalit”, tha Mujku për RTK.
Kryeshefi i Ujësjellësit, Arsim Fetahu, vetëm përmes telefonit tha se Fabrika në Shkabaj kërkon që uji nga Ibër-Lepenci të vijë më i pastër e jo me turbullira.
