Mesfushori shqiptar Migjen Basha ka treguar se ai dhe bashkëlojtarët e tij te skuadra australiane Melbourne Victory janë në karantinë, pasi kishin udhëtuar javën e kaluar në Zelandë të Re për të luajtur me skuadrën Wellington Phoenix në një ndeshje kampionale.
Qeveria australiane ka marrë vendim që të gjithë që vijnë me aeroplan për në Australi të futen në karantinë për dy javë.
Ndeshja e Melbourne Victoryt e paraparë të luhej sot me Brisbane Roar në kuadër të A League është shtyrë.
“Unë jam në karantinë për një situatë të caktuar. Një skuadër nga Zelanda e Re luan në kampionatin e Australisë. Ne ishin në Wellington të dielën e kaluar për një ndeshje dhe qeveria australiane ka vendosur se të gjithë që kanë fluturuar për në Australi automatikisht do të përfundojnë në karantinë. Si rezultat kanë shtyrë ndeshjet tona. Derisa pjesa tjetër e kampionatit po luhet pa tifozë. Bashkëshortja ime mund të dal, si dhe fëmijët e mi, nuk mbizotëron frika, nuk ka shumë raste me koronavirus në Australi. Por, si masë parandaluese, shkollat janë mbyllur”, ka deklaruar Basha për “Tuttomercatoweb”.
Basha 33-vjeçar iu bashkua Melbournet këtë stinor. Një pjesë të madhe të karrierës ai e ka kaluar në futbollin italian. Ai ka folur për krizën e shkaktuar nga pandemia në Itali.
“Unë po e shikoj se çfarë po ndodh në Itali dhe shpresoj që çdo gjë të përmirësohet sa më shpejt të jetë e mundur. Italia do të ngrihet sërish dhe do të jetë në gjendje të luftojë virusin. Nuk ka shumë raste në Australi, por shteti po planifikon të mbyllë aeroportet, shkollat, si masë parandaluese”, ka deklaruar Basha.
Basha ka folur edhe për kualitetin e futbollit në Australi dhe shpreson të luajë sa më gjatë.
“Për fat të keq në Evropë njerëzit mendojnë se futbolli në Australi nuk ia vlen. Por, në realitet ka lojtarë dhe skuadra që kanë kualitet dhe përgatitje fizike. Unë nuk mund të them nëse do të kthehem sërish në Evropë. Kam kontratë deri në vitin 2021 dhe jam 33-vjeçar. Por, dua të luajë sa më gjatë të jetë e mundur”.
