Ish -zëvendësministri i Punëve të Jashtme, Anton Berisha, ka dhënë përkrahjen e tij për veprimin e djeshëm të Ushtrueses së Detyrës së Presidentit, Vjosa Osmani, për shfuqizimin e disa dekreteve për emërimin e konsujve.
Ai ka thënë se sa ka qenë në detyrë në kohën e Qeverisë së drejtuar nga Ramush Haradinaj, disa prej shteteve të fuqishme – mike të Kosovës kanë shprehur shqetësim në këtë drejtim.
“Me përgjegjësi të plotë, e theksoj se në vazhdimësi dhe sidomos në kohën sa isha zëvendësministër i jashtëm, përfaqësues të shteteve mike me peshë, më kishin shprehur shqetësimin e tyre që Qeveria e Kosovës emëronte në shtetet e tyre diplomatë përtej normave duke shfaqur dyshimin në qëllime, e që nënkuptueshëm krijonte pakënaqësi diplomatike”, ka shkruar Berisha në Facebook.
Tutje ka shkruar Berisha se “Shndërrimi i shërbimit diplomatik në politikë të brendshme dhe në përmbushjen e dëshirave të individëve e grupeve, gjithnjë në dëm të shtetit të Kosovës duhet të ndërpritet, dhe dje u dha një sinjal shpresëdhënës nga u.d. se presidentit që meriton përkrahjen”.
Postimi i plotë i Berishës:
Qëndrimi im, dite me pare, kritik ndaj gjuhës diplomatike qe kishte përdorur u.d. Presidentit zonj. Vjosa Osmani ndaj BE-se, dhe përkrahja ime e djeshme ndaj saj në veprimet për rishqyrtimet e dekreteve për emërimet diplomatike, qartazi tregojnë neutralitetin tim ndaj personit dhe orientimit politik.
Ne fakt, ato tregojnë formimin dhe përgjegjësinë time për të ndarë temat shtetërore nga individualizimi dhe politizimi qe tashme për fat te keq është bere rregull ne Kosove.
U.d. Presidentit dje ka bere veprimin e duhur, duke ndihmuar shtetin.
Se pari, ne rrafshin e brendshëm, ajo duke shfuqizuar emërimet arbitrare ka dhënë shenjen e parë, që do ti qaset me seriozitet shërbimit diplomatik qe ka peshe te jashtëzakonshme për organizimin e shtetit.
Se dyti, ajo ka bere hapin e parë, të ndërprerjes se krijimit e emërimit te konsulatave dhe diplomateve pa pajtimin e shteteve përkatëse.
Me përgjegjësi te plote, e theksoj se ne vazhdimësi dhe sidomos ne kohen sa isha zëvendësministër i jashtëm, përfaqësues te shteteve mike me peshe, me kishin shprehur shqetësimin e tyre qe qeveria e Kosovës emëronte ne shtetet e tyre diplomate përtej normave duke shfaqur dyshimin ne qëllime, e qe nënkuptueshëm krijonte pakënaqësi diplomatike.
Shndërrimi i shërbimit diplomatik ne politike te brendshme dhe ne përmbushjen e dëshirave te individëve e grupeve, gjithnjë në dëm të shtetit të Kosovës duhet të ndërpritet, dhe dje u dha një sinjal shpresëdhënës nga u.d. se presidentit qe meriton përkrahjen.
