Aktualisht në Kuvendin e Republikës së Kosovës po mbahet seanca me deklarime jashtë rendit të ditës dhe pyetje parlamentare, përcjell KosovaPost.
Në këtë kuadër, deputeti nga rradhët e partisë së AAK-së, Besnik Tahiri ka kërkuar që të votohet rezoluta e propozuar nga AAK, duke shtuar kështu se duhet të bashkohen njësoj siç u bashkuan kur Kryeministri Kurti kishte propozuar rezolutë për ndaljen e referendumit të Serbisë.
“Të bashkohemi sot, si për referendumin, ta votojmë një rezolutë që të mos ketë diskriminim. Mos të hyp çmimi i rrymës. Disa qytetarëve u duhet me pagu 150 % më shtrenjtë”, theksoi ai.
Tutje ai fajësoi Kryeministrin Kurti për rritjen e çmimit të energjisë elektrike, gjërsa bëri një krahasim qëndrimesh të Kryeministrit Kurti me ato të vitit 2019 dhe 2022.
“Ankimin do ta bëjmë edhe me protestë. Që tri vjet nuk i kemi ngrit pagat, po ashtu kemi edhe inflacion. Andaj ngritja e çmimit është e papranueshme”, u shpreh ai.
