Presidenti i zgjedhur amerikan Joe Biden sot propozoi ish-Zëvendëssekretarin e Shtetit, William Burns, si të nominuarin e tij për drejtorin e CIA-s, transmeton Kosova Post.
“Bill Burns është një diplomat shembullor me përvojë prej disa dekadash në skenën botërore duke mbajtur të sigurt popullin dhe vendin tonë. Ai ndan bindjen time të thellë se inteligjenca duhet të jetë jopolitike dhe që profesionistët e përkushtuar të shërbimit të inteligjencës që i shërbejnë kombit tonë meritojnë mirënjohjen dhe respektin tonë”, tha Biden në një deklaratë.
“Ambasadori Burns do të sjellë njohurinë, gjykimin dhe perspektivën që na duhet për të parandaluar dhe përballur kërcënimet përpara se të arrijnë në brigjet tona”, theksoi Biden, duke shtuar se “populli amerikan do të flejë i qetë me të si drejtori ynë i ardhshëm i CIA-s”.
Burns, një diplomat karriere, ka shërbyer në Shërbimin e Jashtëm të SHBA-së për 33 vjet, si dhe në disa pozicione të sigurimit kombëtar në pesë administrata Demokratike dhe Republikane.
“Pavarësisht nëse janë sulme kibernetike që vijnë nga Moska, sfida që paraqet Kina, ose kërcënimi me të cilin përballemi nga terroristët dhe aktorët e tjerë, ai ka përvojën dhe aftësinë për të bërë përpjekje efektive në gjithë qeverinë dhe në gjithë botën për të siguruar që CIA të jetë pozicionuar për të mbrojtur popullin amerikan”, thuhet në deklaratë. (AA)
