Zëvendëskryeministri Besnik Bislimi e hapi mbledhjen e sotme të Qeverisë duke folur kryesisht për aplikimin e Kosovës në Këshillin e Europës, të cilin e cilësoi si hap të rëndësishëm përpara.
Bislimi përmendi edhe benefitet e Kosovës nga anëtarësimi në këtë organizatë, gjë që sipas tij, do të ndikojë për mirë edhe në gjyqësorin e vendit.
“Pas anëtarësimit, qytetarët tanë do ta kenë edhe një instancë europiane pët t’i adresuar çështjet e tyre. Kjo do të jetë në të mirë të tyre dhe do të ketë ndikim në funksionimin e gjyqësorit në vend”, tha ai.
Bislimi tha se aplikimi ka qenë “i koordinuar me miqtë e Kosovës”, ndërsa u shpreh se “Qeveria do të punojë me përkushtim hap pas hapi” në këtë proces.
Bislimi po ashtu beson se vendet anëtare që nuk e njohin pavarësinë e Kosovës, nuk do ta pengojnë anëtarësimin e saj në Këshillin e Europës.
