Përfaqësuesi i Lartë i Bashkimit Evropian për Punë të Jashtme dhe Politikë të Sigurisë, Josep Borrell, ka bërë të ditur se Bashkimi Evropian nuk do të veprojë njëjtë si Shtetet e Bashkuara të Amerikës, në lidhje me tërheqjen e stafit nga Ukraina.
Borrell para gazetarëve tha se do të kenë një takim me Sekretarin Amerikan të Shtetit, Antony Blinken, i cili sipas tij, do t’i tregoj atij arsyet specifike në lidhje me vendimin.
“Ne do të kemi një video-konferencë me Sekretarin e Shtetit të Shteteve të Bashkuara, Antony Blinken në mënyrë që të vazhdojmë koordinimin tonë të fortë. Sekretari Blinken do të na shpjegojë arsyet e këtij njoftimi. Ne nuk do të bëjmë të njëjtën gjë, sepse nuk dimë ndonjë arsye specifike. Por sekretari Blinken do të na informojë dhe nuk mendoj se duhet ta dramatizojmë situatën. Për sa i përket negociatave ato po vazhdojnë dhe nuk mendoj se duhet të largohemi nga Ukraina. Por ndoshta Sekretari Blinken ka më shumë informacion që do të ndajë me ne”, është shprehur Borrell.
Borrell, gjithashtu u pyet se a është Gjermania një partner i besueshëm kur bëhet fjala për situatën me Rusinë, pasi sipas gazetarëve, Berlini po dërgon mesazhe të përziera në lidhje me sanksionet.
Ai tha se të gjithë anëtarët e BE-së janë partnerë të besueshëm dhe se ata, (BE), sipas Borrell po tregojnë unitet të paprecedentë për situatën në Ukrainë.
“Të gjithë anëtarët e Bashkimit Evropian janë të bashkuar. Ne po tregojmë një unitet të paprecedentë për situatën në Ukrainë me një koordinim të fortë me Shtetet e Bashkuara, duke qenë të koordinuar në mënyrë përfekte dhe duke u informuar për atë që po ndodh. Nuk ka problem me asnjë shtet anëtar”, ka thënë Borrell, njofton Klankosova.tv.
Ndërsa, sa i përket masave sanksionuese nga BE ndaj Rusisë, Borrell tha se gjithçka do të jetë gati kur të jetë e nevojshme.
