Ish-deputetja e Partisë socialiste, Rudina Seseri është cilësuar nga revista prestigjoze “Woman Entrepreneurs” si një ndër 100 gratë më me influencë në botë. Sipas revistës, këto gra po riformulojnë botën e biznesit. “Inteligjenca artificiale po riformulon jetën tonë. Cfarë na pret tashmë? Kjo është ajo çfarë po përpiqet të zbulojë Rudina Seseri”-shkruan “Woman Entrepreneurs”.
Durrsakja, e cila u tërhoq në vitin 2011 nga politika, ka themeluar kompaninë “Glasswing Ventures” në vitin 2016, një kompani kjo që po ndihmon në ndërtimin e gjeneratës tjetër të kompanive teknologjike të inteligjencës artificiale. Kompania me bazë në Boston ka një vlerë prej 112 milion dollarësh në vitin 2018 dhe që është partnere në investim në 19 biznese.
Në muajin qershor, “Glasswing Ventures”, prezantoi një platformë përshpejtuese për të ndihmuar themeluesit të ecin më shpejt me ndihmën e 34 këshilltarëve dhe me me një bazë të dhënash nga 16 mijë individë që firmat e reja përdorin për të gjetur talentin.
Teksa themeloi “Glasswing”, Seseri thotë se i kushton cdo javë kohë të menduarit, shkruan tiranatoday. “Diçka që mund të neglizhohet lehtësisht është koha e të menduarit. Bëni një hap pas dhe reflektoni: Ku jam? Ku po shkojmë?- thuhet në shkrim.
