Në iftarin tradicional të shtruar nga dr. Shefqet Krasniqi me rastin e muajit të bekuar të Ramazanit u promovuan pesë librat e tij të fundit nga fusha e Tefsirit (komentimit )të Kur’anit të Madhërishëm. Librat “Koment i Sures Nur – Kaptina e rregullave familjare”, “Koment i Sures Furkan”, “Koment i Sures Shuara – Poetët”, “Koment i Sures Neml – Milingonat” dhe “Koment i Sures Kasas – Tregimet”, ishin pesë librat të cilat u promovuan në praninë e qindra mysafirëve të cilët kishin ardhur enkas nga Kosova, Shqipëria, Maqedonia e Veriut, Lugina e Preshëves, Mali i Zi si dhe nga dispora që nga Belgjika, Gjermania e deri të Finlanda, për të nderuar punën e palodhshme të dr. Shefqet Krasniqit.
Panelistët e përzgjedhur me rastin e këtij promovimi po ashtu ishin nga të gjitha fiset shqiptare, dr. Justinian Topulli nga Tirana, dr. Fatmir Zaimi nga Shkupi, hoxhë Ulvi Fejzullahu nga Lugina e Preshevës, hoxhë Xhevahir Arifaj nga Tuzi si dhe hoxhë Irfan Salihu nga Prizreni. Panelistët e vlerësuan jashtëzakonisht shumë punën e pa lodhshme shkencore të dr. Shefqet Krasniqit dhe cilësinë shkencore të librave të botuar. Dr. Justinian Topulli në fjalën e tij për librin “Koment i Sures Neml – Milingonat” vlerësoi se është nder për të dhe për imamët shqiptarë që kanë rastin dhe mundësinë të paraqesin komentin e tyre mbi librat e dr. Krasniqit. E vlerësoi lartë gjuhën e përdorur në libra duke u shprehur se librat e dr. Krasniqit, janë të qarta, të kuptueshme dhe të dashura për çdo shqip folës. Hoxhë Ulvi Fejzullahu, gjatë fjalës së tij potencoi se librat e dr. Shefqetit janë ekuivalente me librat më të ri shkencor që janë botuar në po të njëjtin vit nga shkencëtarë dhe studiues të shkencave të tefsirit nga vendet arabe. Dr. Fatmir Zaimi, në fjalën e tij krahas vlerësimit të lartë për punën e dr. Shefqetit potencoi se i njëjti është i palodhshëm në punën e tij qoftë si ligjërues i Komentimit të Kur’anit e po ashtu edhe si autor librash me këtë tematik. Hoxhë Irfan Salihu, gjatë ekspozesë së tij, e vuri theksin te rëndësia e punës së madhe të dr. Shefqetit duke e cilësuar si prijatar në të mirën dhe rëndësinë që ka për popullin tonë një prijës i drejt edhe në fushën shkencore e fetare. Fjalë rasti po ashtu mbajti edhe deputeti dhe kryesuesi i Komisioni parlamentar për Siguri, z. Bekë Berisha, i cili e vlerësoi jashtëzakonisht lartë punën e dr. Shefqetit që nga lufta çlirimtare e deri sot.
Në fjalën e tij përmbyllëse të pranishmëve ju drejtua edhe autori i librave, dr.Shefqet Krasniqi, i cili krahas falenderimeve të pafundme ndaj Zoti të Madhërishëm për të mirat e pafundme që ja ka dhënë popullit tonë dhe lutjeve për Pejgamberin alejhi selam si udhëzues e udhërrëfyes i njerëzimit drejt paqes e mëshirës ndaj njëri tjetrit, falenderoi përzemërsisht të pranishmit si dhe ata të cilit nuk ishte e mundur të ishin sonte të pranishëm në këtë iftar dhe promovim. Në të njëjtën kohë dr. Krasniqi, potencoi rëndësinë e muajit të bekuar të Ramazanit duke e cilësuar si muaj i bashkimit të njerëzve, pa marrë parasysh dallimet politike, ideologjike apo bindjeve. Muaji Ramazan është muaji i cili na bashkon të gjithëve, pa marrë parasysh dallimet që i kemi midis nesh, bindjet politike e partiake apo divergjencat eventuale, prapë se prapë jemi këtu së bashku. Kështu së bashku duhet të jemi çdo herë e në veçanti kur bëhet fjalë për interesat madhore të Kombit tonë dhe ëndrrës shekullore që kemi për bashkim e fuqizim kombëtar. Dallimet midis nesh janë përcaktim nga Allahu i Madhërishëm, por, është detyrim i yni, i prijësve tonë dhe i popullit tonë që për çështjet madhore të kombit të jemi të bashkuar dhe të unifikuar.
Dr. Krasniqi po ashtu bëri një reflektim të shkurtër edhe sa i përket historikut të komentimit të Kur’anit, duke potencuar se historia e komentimit të Kur’anit nis që nga koha e Muhamedit s.a.s, nga shokët e Pejgamberit a.s. dhe pastaj dijetarëve të hershëm e të vonshëm. Në misionin fisnik të komentimit të Kur’anit krahas shumë dijetarëve arab dhe jo arab jam përpjekur dhe unë të ofroi kontributin tim për të sjellur komentimin e sureve të Kur’anit në gjuhën time të ëmbël e të dashur, në gjuhën shqipe. Dr. Krasniqi fjalën e tij e përmbylli me mesazhe të qarta dhe thirrje për angazhim të çdo njërit prej nesh në dobi të vendit tonë, kombit tonë dhe fesë sonë.
