Zëdhënësi i Ministrisë ruse të Mbrojtjes, Igor Konashenkov tha se në tre ditët e fundit 1.730 ushtarë ukrainas janë dorëzuar në fabrikën e Metalurgjisë Azovstal në Mariupol, transmeton Kosova Post.
Lidhur me situatën e ushtarëve ukrainas në fabrikën e Metalurgjisë Azovstal, Konashenkov tha se “Në ditën e fundit janë dorëzuar 771 luftëtarë nga batalioni nacionalist Azov. Që nga 16 maji e deri më tani janë dorëzuar gjithsej 1.730 luftëtarë prej të cilëve 80 të plagosur”.
Ai shtoi se ushtarët e plagosur janë trajtuar në spitalin në Novoazovsk.
“Ofensivat e ushtrisë ruse në Ukrainë vazhdojnë. Me raketa me precizitet të lartë të lëshuara nga ajri janë goditur 7 qendra komandimi, 11 pozicione në të cilët ndodheshin municione, ushtarë dhe mjete teknike të ushtrisë ukrainase. Në rajonin Mykolaiv janë shkatërruar sistemet raketore të mbrojtjes ajrore S-300 dhe disa pjesë të sistemeve raketore të mbrojtjes ajrore Buk-M1 në Donetsk”, tha Konashenkov.
Njësitë taktike luftarake ajrore ruse kanë goditur mbi 340 forca të armatosura nacionaliste në 58 zona, theksoi Konashenkov duke shtuar se në rajonet Kharkiv dhe Kherson kanë shkatërruar 15 mjete ajrore pa pilot të Ukrainës.
“Deri më sot janë rrëzuar 172 avionë, 125 helikopterë, 942 mjete ajrore pa pilot ndërsa janë shkatërruar 313 sisteme raketore të mbrojtjes ajrore, 3.158 tanke dhe mjete të blinduara, 395 multi-raketahedhëse, 1.562 obusë dhe mortaja si dhe 3.026 mjete ushtarake të veçanta të ushtrisë së Ukrainës”, tha Konashenkov.
