Kryetari i Komunës së Ferizajit, Agim Aliu, tha se gjashtë persona të plagosur rëndë në shpërthimin e djeshëm të një bombole gazi në një restorant në qytet, do të transferohen në Turqi për trajtim, transmeton Kosova Post.
Aliu konfirmoi për AA se këshilli mjekësor ka marrë vendim për dërgimin e të lënduarve për mjekim jashtë vendit.
“Trajtimi i të lënduarve jashtë vendit është i domosdoshëm. Sot, Këshilli Profesional i Mjekëve në Shërbimin Spitalor të Qendrës Klinike Universitare të Kosovës vlerësoi se gjashtë nga të lënduarit janë në gjendje të rëndë dhe duhet të dërgohen urgjentisht jashtë vendit për trajtim”, tha Aliu.
Ai theksoi se po përgatitet dokumentacioni i nevojshëm, i cili tashmë është dorëzuar në Ministrinë e Shëndetësisë, dhe se të lënduarit pritet të transferohen në Turqi sonte vonë ose nesër në mëngjes.
Më herët, Aliu njoftoi në një postim në median sociale se po bëheshin përpjekje për të lehtësuar procedurën e trajtimit të të lënduarve rëndë në Republikën e Turqisë dhe se Ambasada e Turqisë në Kosovë ishte kontaktuar për këtë qëllim.
Ndryshe, më shumë se 40 persona u lënduan në një shpërthim të një bombole gazi në një restorant dje në Ferizaj, nga të cilët 14 persona me djegie nga 35 deri 50 për qind u transferuan në Qendrën Klinike Universitare të Kosovës në Prishtinë. Të lënduarit janë të moshës 25 deri në 45 vjeç. (AA)
