Drejtori i zyrës për Kosovën në Qeverinë e Serbisë, Marko Gjuriq ka reaguar lidhur me rrugën Deçan – Plavë. Të martën është promovuar pjesa e parë e kësaj rruge, që sipas kryeministrit të Kosovës, Avdullah Hoti, është projekt i rëndësishëm për trojet shqiptare.
Gjuriq ka reaguar lidhur me një kontest që është me Manastirin e Deçanit, për pronat në afërsi të këtij objekti fetar. Gjuriq ka kërkuar që të respektohet zona e mbrojtur e manastirit dhe “të ndalet paligjshmëria”.
“Pres që përfaqësuesit e bashkësisë ndërkombëtare të reagojnë me vendosmëri dhe të parandalojnë paligjshmërinë në afërsi të manastirit, i cili është në listën e UNESCO-s për trashëgiminë kulturore botërore”, thuhet në një deklaratë të Gjuriqit./Koha.net/
Për përurimin e rrugës ka reaguar edhe Lista Serbe, që është pjesë e Qeverisë së Kosovës.
“Lista Serbe është e dëshpëruar me ceremoninë e sotme për hapjen e një pjese të rrugës, ku morën pjesë anëtar të Qeverisë së Kosovës. Rruga ndërtohet në zonën e Manastirit të Deçanit, që me ligj është e mbrojtur dhe në kuadër të kësaj ndalohen punime të tilla”, thuhet në reagim e kësaj partie.
Lista Serbe ka dënuar sjelljen e zyrtarëve të Qeverisë së Kosovës dhe ka ftuar përfaqësuesit ndërkombëtar që “të reagojnë menjëherë dhe të ndalin këto aktivitete ilegale”.
