Gjykata e Lartë në SHBA i jep një goditje të fortë përpjekjeve të presidentit amerikan Joe Biden për të luftuar pandeminë e Covid-19, duke bllokuar urdhrin e administratës për vaksinim ose testim të detyrueshëm në bizneset e mëdha, në një kohë kur infeksionet po përhapen me shpejtësi.
“Punonjësit privatë mund të zgjedhin të vaksinohet ose të testohen, por Gjykata e Lartë tha sot se qeveria federale nuk mund t’i detyrojë ta bëjnë”, u shpreh avokati Elie Honig.
E megjithatë Gjykata e Lartë i dhuroi një fitore administratës Biden, duke lënë në fuqi urdhrin për vaksinimin e detyrueshëm të punonjësve të shëndetësisë.
“Urdhri për vaksinimin e detyrueshëm të punonjësve të shëndetësisë do të shpëtojë jetët e pacientëve dhe po ashtu të mjekësve, infermierëve dhe të tjerëve që punojnë në këtë sektor. Do të mbulojë 17 milionë punonjës në 76 mijë facilitete mjekësore”, deklaroi zëdhënësja e Shtëpisë së Bardhë.
Presidenti Biden tha në një deklaratë se ishte i zhgënjyer nga vendimi që bllokon urdhrin e vaksinimit të punonjësve në kompani të mëdha. Por Shtëpia e Bardhë theksoi se nuk heq dorë nga planet për të inkurajuar bizneset privatë, për të kërkuar vullnetarisht vaksinim të detyrueshëm.
SHBA përballet me një valë të vrullshme infektimesh, ndërsa varianti Omicron po nxit rekord rastesh dhe shtrimesh në spital. Administrata Biden kishte vlerësuar se vaksinimi i detyrueshëm do të shpëtonte 6500 jetë dhe do të parandalonte 250 mijë shtrime në spital.
Vendimi i Gjykatës gëzoi paraardhësin e Biden, Donald Trump, i cili tha se urdhri do të kishte dëmtuar edhe më shumë ekonominë. a2cnn.
