Departamenti Special i Gjykatës së Apelit, e ka refuzuar, ankesën e avokatit mbrojtës, të pandehurit ish gjyqtarit të Gjykatës Themelore të Pejës Sali Berisha kundërvazhdimit të masës së paraburgimit prej dy muajsh.
Në këtë mënyrë, apeli e ka lënë në fuqi aktvendimin e Gjykatës Themelore në Prishtinë, të 18.10.2019, sipas të cilit kjo masë do të zgjas deri më 19.12.2019.
S.B. po dyshohet nga ana e prokurorisë se ka kryer veprat penale: “Shpërdorim i pozitës apo autoritetit zyrtarë nga neni 414 par.1 të Kodit Penal të Republikës së Kosovës (KPRK) dhe “Mbajtja në pronësi, kontroll, posedim apo shfrytëzim të paautorizuar të armëve” nga neni 374par.1 i po këtij kodi, shkruan Kosovasot.
Gjykata e Apelit gjeti se gjykata e shkallës se parë, drejtë ka vlerësuar se meqenëse ekziston dyshimi i bazuar se i pandehuri i ka kryer veprat penale në fjalë, ka bazë ligjore për vazhdimin e paraburgimit konform dispozitave të Kodit të Procedurës Penale, ngase ka arsye për të besuar se me gjetjen e tij në liri, i njëjti mund të ikë ose arratiset, më qëllim të shmangies se procedurës penale, apo të ndikoj në prova ose dëshmitarë, më qellim të pengimit të rrjedhës normale të saj.
