Kryetari i AAK-së, Ramush Haradinaj ka reaguar ndaj deklaratave të presidentit të Serbisë Aleksandër Vuçiq, i cili ka thënë se nëse Kosova provon të anëtarësohet në cilëndo organizata ndërkombëtare do ta presin befasi.
Haradinaj ka shkruar në Facebook se Vuçiq, ndihet i fortë tani kur Kosova ka një Qeveri të shkarkuar dhe një President të dobët në detyrë.
“Ne kemi nevojë për një President i cili qëndron fortë për Kosovën dhe është i denjë të përballet me kundërshtarin agresiv, Serbinë”, ka shkruar ai.
Postimi i plotë i Haradinajt në Facebook:
Fqinji ynë agresiv po u kthehet kërcënimeve të tij të zakonshme kundër Shtetit tonë!
Ai ndihet i fortë tani kur Kosova ka një Qeveri të shkarkuar dhe një President të dobët në detyrë.
Ne kemi nevojë për një President i cili qëndron fortë për Kosovën dhe është i denjë të përballet me kundërshtarin agresiv, Serbinë.
Ndërsa e krijuam ushtrinë në kohën sa isha Kryeministër, një punë që ishte kundër bindjes së fqinjit tonë, në mandatin tim si president, Kosova do të bëhet pjesë e NATO-s!
Ky është çelësi i sigurisë dhe i paqes në rajon dhe përgjigja më e mirë në deklaratat luftënxitëse të Vuçiqit!
Kujtojmë se presidenti i Serbisë, Aleksandar Vuçiq, ka thënë se nëse Kosova provon të anëtarësohet në cilëndo organizata ndërkombëtare do ta presin befasi.
Sipas tij, pala kosovare nuk i lexon marrëveshjet që vet i nënshkruan.
“Nëse nuk e respektojnë edhe marrëveshjen e Brukselit, atëherë i pret një befasi. Ata e dinë se kur e them unë këtë e kam vërtetë. Unë jam gjithmonë njeri i përpiktë, nuk bëj bllof. Nëse Kosova provon të anëtarësohet në organizata ndërkombëtare, do ta presin disa befasi, ata e dinë këtë”, ka thënë ai në një intervistë për TV Happy. Vuçiq ka shtuar se nuk është i interesuar për konflikt të ngrirë.
