Deputeti i Lidhjes Demokratike të Kosovës, Avdullah Hoti, ka thënë se Qeveria e Kosovës nuk është duke ulur tatimet për qytetarët e vendit, përcjell KosovaPost.
Ai, me anë të një postimi në rrjetin social Facebook, ka bërë një krahasim me Gjermaninë, në të cilin ka treguar se ky shtet ka vendosur të ulë tatimin në vlerën e shtuar në gaz dhe nxehje nga 19 përqind në shtatë përqind, duke filluar nga 1 tetor 2022 deri në prill 2024.
“Në rastin e Kosovës, janë tri veprime që e zbusin krizën, por që po mungojnë nga muaji mars. Indeksimi i pagave, subvencioneve në bujqësi, pensioneve dhe ndihmave sociale me normën e inflacionit”.
“Rritja e pagës minimale në sektorin privat, ulja e TVSH nga 18% në 8% për naftë dhe për disa produkte ushqimore që ende janë me 18% TVSH, si dhe pezullimi i përkohshëm i akcizës në naftë”, ka shkruar Hoti.
Postimi i plotë:
Për të ndihmuar qytetarët në përballje me inflacionin, Gjermania ka vendosur të ulë Tatimin në Vlerën e Shtuar në gaz dhe nxemje nga 19% në 7% duke filluar nga 1 tetor 2022 deri në prill 2024.
Në rastin e Kosovës, janë këto veprime që e zbusin krizën, por që po mungojnë nga muaji mars:
1. Indeksimi i pagave, subvencioneve në bujqësi, pensioneve dhe ndihmave sociale me normën e inflacionit,
2. Rritja e pagës minimale në sektorin privat,
3. Ulja e TVSH nga 18% në 8% për naftë dhe për disa produkte ushqimore që ende janë me 18% TVSH,
4. Pezullimi i përkohshëm i akcizës në naftë.
Kjo qeveri jo vetëm që nuk po ul tatimet, por po e zvogëlon qarkullimin në ekonomi edhe duke mos implementuar qindra miliona euro investime kapitale.
Sikur të ishin futur në ekonomi qindra miliona euro përmes projekteve kapitale, krahas uljes së tatimeve, do të rritej kërkesa agregate dhe do të parandalohej thellimi i krizës.
Të gjitha këto masa nuk paraqesin problem për deficitin buxhetor, pasi bilanci bankar i Qeverisë është rekord i lartë. Këto veprime mund të merren menjëherë dhe jam i sigurt se e kanë mbështetjen e të gjitha palëve.