Me 24 shkurt mbushet plot një vit nga agresioni rus mbi Ukrainën.
Në emër të gjoja demilitarizimit dhe denazifikimit, presidenti rus Vladimir Putin urdhëroi një “operacion special” në mëngjesin e 24 shkurtit, shkruan Kosova Post.
Mbi 200 mijë forca ushtarake ruse sulmuan nga veriu dhe verilindja duke iu afruar kryeqytetit, Kievit.
Derisa kjo luftë shkaktoi largimin e rreth 8 milionë ukrainasve dhe qindra mijëra viktima, shumica e vendeve perëndimore u rreshtuan me Ukrainën.
I vetmi vend në Evropë që refuzoi t’i bashkohej sanksioneve ndaj Rusisë dhe shkëputjes së marrëdhënieve me Moskën ishte Serbia.
Kjo mbështetje tashmë është edhe në formën e vullnetarëve që po marrin pjesë si njësi paramilitare në rajonin e Zaporozhyes.
Faqja “Syria”, e cila siç merr vesh portali Kosova Post është e lidhur me bazën ruse në Latakia në Siri, ka publikuar fotografi të paramilitarëve serbë.
“Vullnetarë nga Serbia po luftojnë në anën e ushtrisë ruse në rajonin e Zaprozhyes”, thuhet në përshkrimin e shkurtër të këtij njoftimi që prej ditësh është afishuar në këtë medium prorus në Siri.
Paramilitarë serbë janë lajmëruar në Ukrainë qysh më 2014 me rastin e aneksimit të Krimesë dhe më pastaj në rajonet e Luhanskut dhe Donbasit.
Mbështetja popullore serbe për agresionin rus ishte zëruar edhe nga emra të njohur të artit e popkulturës në Serbi si regjisori nacionalist Emir Kosturica dhe këngëtari i turbotallavasë jugosllave, Goran Bregoviq.
Më 2015, për shkak të përkrahjes që i kishte dhënë regjimit të Putinit, autoritetet e Kievit e kishin shpallur person non grata Goran Bregoviqin, të cilin kryeministri Edi Rama më 2005, në cilësinë e kryebashkiakut të Tiranës, e pati nderuar me çmimin “Çelësi i Tiranës”, kurse më 2021, në gusht, ishte i ftuar special në një koncert në Korçë në margjinat e festivalit të Birrës. /Kosova Post/
