Një faqe interneti e lajmeve e hebrenjve ultra-ortodoksë (Haredi) në Izrael ka kërkuar falje për censurimin e fytyrave të grave në fotografinë e një lajmi të publikuar, transmeton Anadolu Agency (AA).
Organizata joqeveritare reformiste e Izraelit, Qendra e Veprimit Fetar të Izraelit (IRAC), ka fituar një padi kundër faqes hebraike ultra-ortodokse të vendit “Behadrei Haredim” për “diskriminim gjinor” në një foto të publikuar.
Sipas gazetës Haaretz, në fotografinë ku janë censuruar fytyrat e grave, kanë qenë anëtarët e lëvizjeve konservatore reformiste në Izrael dhe drejtuesit e organizatës feministe të grave hebreje “Gratë e Murit”.
Pas padisë së ngritur në maj, palët që kërkuan zgjidhje jashtëgjyqësore arritën një marrëveshje dhe “Behadrei Haredim” pranoi të kërkonte falje sipas marrëveshjes.
Portali ultra-ortodoks publikoi mesazhin e saj të kërkimfaljes në faqen e saj kryesore më 2 dhjetor.
“Behadrei Haredim” pranoi të ripublikonte mesazhin e kërkimfaljes për dy orë këtë mëngjes, pasi IRAC argumentoi se koha “nuk ishte e mjaftueshme për publikimin e duhur të kërkimfaljes”.
Në mesazhin e kërkimfaljes thuhet: “Dëshirojmë të shprehim keqardhjen tonë për gratë në foto për dhimbjen që kanë përjetuar për shkak të publikimit të fotos”.
Avokatja e IRAC, Ori Narov, ka thënë: “Kjo është një arritje shumë e rëndësishme për ne. Shpresoj se ky vendim do t’i pengojë mediat ultra-ortodokse nga censurimi i grave në të ardhmen dhe shpresoj që gratë ultra-ortodokse tani të kuptojnë se kanë arsye për të paditur dhe për të kërkuar kompensim nëse fytyrat e tyre censurohen”.
Fotografia në fjalë tregonte një takim brruash dhe grash në dhjetor 2021 midis presidentit izraelit, Isaac Herzog, dhe udhëheqësve të lëvizjeve fetare joortodokse. Mirëpo “Behadrei Haredim” kishte postuar foton e takimit vetëm me fytyrat e censuruara të grave.
Është e njohur si një praktikë e zakonshme në mediat ultra-ortodokse të Izraelit që fytyrat e grave mjegullohen.
Thuhet se kjo është hera e parë që ngrihet një padi kundër një organi mediatik ultra-ortodoks që praktikon një censurë të tillë ndaj grave, si dhe hera e parë që një organ mediatik ultra-ortodoks u kërkon falje grave për këtë praktikë.
– Hebrenjtë ortodoksë nuk përdorin telefona smart, nuk shërbejnë në ushtri
Hebrenjtë ultra-ortodoksë përbëjnë rreth 12 për qind të popullsisë së Izraelit dhe përmenden me emrin hebraik “Haredi”.
Shumica dërrmuese e hebrenjve Haredi në vend jetojnë në lagjen Measherim në Kudsin Perëndimor dhe rrethinat e tij, dhe në qytetin Bney Brak, pranë kryeqytetit Tel Aviv.
Hebrenjtë Haredi, të cilët tërheqin vëmendjen në Izrael me rrobat e tyre të zeza dhe zgjatjen e flokëve, shquhen shpesh me protestat e tyre kundër shërbimit të detyrueshëm ushtarak.
Shumica e hebrenjve Haredi, të cilët kanë tensione me hebrenjtë laikë dhe kryesisht refuzojnë të integrohen me pjesën tjetër të shoqërisë, nuk pranojnë shërbimin ushtarak me arsyetimin se nuk ka mjedis të përshtatshëm për të praktikuar fenë e tyre në ushtri.
Hebrenjtë ultra-ortodoksë, të cilët janë gjithashtu kundër përdorimit të internetit dhe telefonave smart, po bëjnë propagandë në rrugë kundër përdorimit të internetit në lagjet ku jetojnë dhe varin mesazhe paralajmëruese në mure se gratë nuk duhet të vishen të me veshje “të hapura”.
Ka dy parti, Tora e Bashkuar dhe Shas, të cilat në parlament përfaqësojnë komunitetin Haredi, popullsia e të cilit po rritet me shpejtësi sepse kanë shumë fëmijë. Të dyja partitë janë në bllokun e djathtë të Benjamin Netanyahut, i cili fitoi zgjedhjet e 1 nëntorit dhe pritet të ketë fjalën në qeverinë e sapoformuar.