KFOR, po shënon Ditën Ndërkombëtare për Eliminimin e Dhunës ndaj Grave, përmes transmetuesit të tij Radio K4, i cili do të mbështesë fushatën e sistemit të Kombeve të Bashkuara “16 ditët e aktivizmit kundër dhunës në bazë gjinore.”
“Fushata vjetore ndërkombëtare fillon çdo vit më 25 nëntor dhe zgjat deri më 10 Dhjetor, Ditën e të Drejtave të Njeriut. Përdoret si një strategji organizimi nga individë dhe organizata në të gjithë botën për të bërë thirrje për parandalimin dhe eliminimin e dhunës ndaj grave dhe vajzave”.
Më shumë se 40 aktivitete do të zhvillohen në Kosovë, duke përfshirë organizata vendore dhe ndërkombëtare si dhe duke përfshirë debate, punëtori, vizita në strehimoret e grave dhe ndriçimin në ngjyrë të portokalltë të disa ndërtesave dhe vendeve të rëndësishme. Tema globale e këtij viti është: “Ngjyros Botën me Portokalli: Financo, Reago, Parandalo,Grumbullo!”
Në vitet e fundit, Radio K4 ka mbështetur fushatat vjetore duke transmetuar audio produkte të cilat janë realizuar së bashku me UN Ëomen, EULEX dhe Ministrinë e Drejtësisë të Institucioneve në Kosovë. Këtë vit, transmetuesi i KFOR-it do të mbulojë shumë ngjarje, duke përfshirë tri punëtori për nxënësit e shkollave të mesme mbi të drejtat e njeriut dhe dhunën në bazë gjinore, aktivitetet e Komisioneve Lokale për Siguri Publike së bashku me Policinë e Kosovës, Akademinë e Dialogut të OSBE-së për femrat e reja.
Bëhet e ditur se në kuadër të kësaj Radio K4 gjithashtu do të transmetojë audio-xhingla kundër dhunës në familje; një çështje shumë e ndjeshme, meqë të gjitha llojet e dhunës kundër grave dhe vajzave në mbarë botën janë intensifikuar që nga shpërthimi i COVID-19 dhe masave pasuese të mbylljes të vedosura për të frenuar pandeminë, sipas të dhënave dhe raportimeve që dalin nga ata në vijat e frontit.
