U.d Presidenti i Republikës së Kosovës, Glauk Konjufca, ka uruar besimtarët e krishterë me rastin e Festës së Pashkëve, përcjell Kosova Post.
U.d Presidenti Konjufca ka thënë se sot për festën e Pashkëve s`do të mund t`i vizitojmë të afërmit e miqtë për urime, por do të mund t`u dërgojmë urimet më të sinqerta për ditë më të mira.
Urimi i u.d presidentit Konjufca:
Kremtet në traditën shqiptare festohen në harmoni ndërvëllazërore.
Sot për festën e Pashkëve s`do të mund t`i vizitojmë të afërmit e miqtë për urime, por do të mund t`u dërgojmë urimet më të sinqerta për ditë më të mira.
Në këtë kohë kur virusi Covid-19 ka pllakosur botën, jemi të shtrënguar të urojmë njëri-tjetrin nga distanca.
Pashkët janë festë e paqes dhe ringjalljes, zemërgjerësisë, tolerancës dhe respektit të ndërsjellë.
Në këtë ditë, uroj të gjithë bashkëkombësit katolikë. Kjo festë sjelltë në shtëpitë tuaja mirësi e begati!
Gëzuar për shumë mote Pashkët!
