Kryetari i Kuvendit të Kosovës, Glauk Konjufca, i shoqëruar nga kryeministri i vendit, Albin Kurti, kanë bërë homazhe pranë përmendores dedikuar personave të zhdukur me dhunë gjatë luftës.
Kosova sot shënon sot Ditën Kombëtare të Personave të Zhdukur me dhunë gjatë luftës, me ç’rast Konjufca deklaroi se vazhdimisht duhet të ngrehet zërin për zbardhjen e fatit të 1 mijë e 621 personave, përcjell teve1.info.
“Sot po i përkujtojmë të gjithë të zhdukurit me dhunë nga Serbia. Ky është pa dyshim njëri nga krimet më të tmerrshme të tyre, pra rrëmbimi e zhdukja me dhunë e mijëra qytetarëve nga ana e aparatit shtetëror e ushtarak të Serbisë. Edhe sot mbeten të pagjetur, jo pse nuk e dimë ku janë, e dimë saktë, e dimë edhe përgjegjësin, është shteti i Serbisë. Për faktin që shumë prej tyre u gjetën në institucionet të cilat i ndërtoi Serbia. Prandaj, çka na mbetet neve, jo vetëm t’i kujtojmë ata, por po ashtu ta ngremë zërin vazhdimisht që fati i tyre të zbardhet, e që Serbia të japë llogari për të gjitha”, deklaroi Konjufca në një prononcim të shkurtër për media.
Konjufca në përmbyllje u bëri lavdi të gjithë martirëve, dëshmorëve e të zhdukurve, të cilët gjatë luftës dhanë jetën për lirinë e Kosovës.
