Përfaqësues të partive parlamentare të Kosovës kanë biseduar pas mbledhjes së Kryesisë së Kuvendit lidhur me mundësinë e mbajtjes së zgjedhjeve presidenciale serbe të caktuara më 3 prill në komunat me shumicë serbe në territorin e Kosovës, raporton Kosova Post.
Përfaqësuesja e Grupit Parlamentar të Lëvizjes Vetëvendosje, Mimoza Kusari-Lila ka thënë se zyrtarisht, Serbia ende nuk i ka bërë kërkesë Kosovës për mbajtjen e zgjedhjeve presidenciale serbe në territorin kosovar.
Ajo tha se vetëm me një kërkesë nga Serbia drejtuar Kosovës, bazuar në ligje të aplikueshme të Kosovës dhe në praktikat evropiane “do të shqyrtohej ajo kërkesë dhe do të merrej vendimi pro apo kundër mbajtjes së zgjedhjeve”.
“Deri në këtë situatë ne nuk kemi një kërkesë nga Serbia për mbajtje të zgjedhjeve. Ka kërkesë nga Serbia drejtuar institucioneve ndërkombëtare por, në Kosovë autoriteti sovran është Qeveria e Kosovës dhe institucionet e Kosovës”, tha Kusari-Lila.
Kusari-Lila tha se edhe në takimin e Komisionit për Stablizim Asociim të mbajtur në Strasburg kanë kërkuar që vetëm në përputhje me ligjet e Kosovës dhe praktikat evropiane që nënkupton kërkesën zyrtare “nga një shtet në shtet tjetër”, mund të miratohet kërkesa për mbajtjen e zgjedhjeve serbe në Kosovë.
Përfaqësuesja e Grupit Parlamentar të Partisë Demokratike të Kosovës (PDK), Blerta Deliu-Kodra tha se për këtë çështje presin të ketë një koordinim më të mirë të forcave politike në parlament dhe jo vetëm.
“Na presin edhe pak ditë deri në afatin e përcaktuar për mbajtje të zgjedhjeve dhe një koordinim më i mirë i institucioneve të Republikës së Kosovës do të kishte qartësi lidhur me procesin e mbajtjes së zgjedhjeve atje. Pres të ketë dinamikë më të shtuar dhe koordinim më të mirë të Qeverisë në raport me aktorë të tjerë”, theksoi Deliu-Kodra.
Kryesia e Kuvendit caktoi dy seanca për këtë javë, seancë të jashtëzakonshme lidhur me rritjen e çmimeve të martën dhe të mërkurën seancë me pikat e mbetura nga seancat e kaluara.
Deliu-Kodra tha në seancën e jashtëzakonshme për rritjen e çmimeve, PDK do të propozojë disa iniciativa të cilat do ta lehtësonin ekonominë familjare në “situatën e rënduar me përballjen e rritjeve të çmimeve”.
Përfaqësuesi i Lidhjes Demokratike të Kosovës (LDK) në Kryesi, Driton Selmanaj tha se Kosova duhet të koordinohet mirë me faktorin ndërkombëtar për çështjen e mbajtjes së zgjedhjeve presidenciale serbe në komunat veriore të Kosovës.
Ai tha se Kuvendi i Kosovës tashmë ka një rezolutë që e ndalon mbajtjen e zgjedhjeve të Serbisë në Kosovë dhe ajo duhet të zbatohet.
Drejtori i Zyrës për Kosovën në Qeverinë e Serbisë, Petar Petkoviq ka thënë se pret që përfaqësuesit e bashkësisë ndërkombëtare, me autoritetin që kanë, t’i mundësojnë popullit serb në Kosovë të votojë në zgjedhjet e Serbisë, të cilat do të mbahen në muajin prill.
Gjithashtu edhe i dërguari i SHBA-së për Ballkanin Perëndimor, Gabriel Escobar dhe i dërguari i Bashkimit Evropian (BE) për dialogun Kosovë-Serbi, Mirosllav Lajçak kanë bërë thirrje që të mundësohet ushtrimi i së drejtës së votës në Kosovë.aa.
