Disa mijëra qytetarë të Kosovës kanë ndërmarrë aksion për të kontribuuar financiarisht në ndihmë të të prekurve nga tërmeti në Türkiye më 6 shkurt, raporton Anadolu.
Pas hutbes dhe namazit të xhumasë, në oborret e xhamive të Kosovës besimtarët muslimanë dhanë kontribut financiar pas thirrjes që Bashkësia Islame e Kosovës (BIK) ua bëri gjithë qytetarëve për të ndihmuar të prekurit e tërmetit në disa zona të Türkiye-s.
Tubimi i mjeteve financiare u bë edhe në Xhaminë e Madhe në Prishtinë, ku shumë qytetarë kontribuuan në fondin e inicuar nga BIK-u.
BIK ka hapur një ditë pas tërmetit po ashtu edhe një xhirollogari bankare si mundësi për të kontribuuar me mjete financiare në mënyrë elektronike për qytetarët që nuk kanë mundësi ta bëjnë fizikisht.
Të paktën 18.991 persona humbën jetën dhe mbi 74 mijë të tjerë janë plagosur pas dy tërmeteve të fuqishme në Türkiye-n jugore të hënën, të cilat u karakterizuan si “katastrofa e shekullit”, njoftoi Agjencia e Menaxhimit të Emergjencave (AFAD).
Tërmetet me magnitudë 7.7 dhe 7.6 ballë sipas shkallës së Rihterit, me qendër në provincën Kahramanmaraş goditën dhjetë provinca dhe prekën më shumë se 13 milionë njerëz.
