Kryetari i Partisë Demokratike të Kosovës, Memli Krasniqi, e ka mirëpritur vendimin e Gjykatës së Apelit për Zyrën e Rregullatorit të Energjisë, përcjell KosovaPost.
Ai, me anë të një postimi në rrjetin social Facebook, ka thënë se vendimi i rritjes së energjisë elektrike ishte i kundërligjshëm.
“Jam shumë i lumtur që qëndrimi ynë parimor për ligjshmëri e në mbrojtje të të drejtave të qytetarëve si konsumatorë, sot i ka lehtësuar nga barra e atij vendimi rreth 450 mijë familje kosovare”, ka shkruar ai.
Poatimi i plotë:
Rritja e çmimit të energjisë elektrike për familjet kosovare nga ana e Qeverisë dhe ZRRE-së, ka qenë vendim i padrejtë dhe i paarsyeshëm. Sot, kemi mirëpritur vendimin e Gjykatës së Apelit, përmes së cilit është rikonfirmuar se ai vendim ka qenë edhe i kundërligjshëm.
Jam shumë i lumtur që qëndrimi ynë parimor për ligjshmëri e në mbrojtje të të drejtave të qytetarëve si konsumatorë, sot i ka lehtësuar nga barra e atij vendimi rreth 450 mijë familje kosovare.
Njëkohësisht, jam shumë falënderues ndaj të gjithë atyre që kanë besuar në këtë kauzë, të cilën ne e kemi ndjekur ligjërisht për të mbrojtur interesin publik dhe qytetarët si konsumatorë.
Si në këtë rast, Partia Demokratike e Kosovës do të vazhdojë të qëndrojë në anën e qytetarëve kundër çdo vendimi të kundërligjshëm e të padrejtë të pushtetit.
