Presidentja e Republikës së Kosovës, Vjosa Osmani, kryeministri Albin Kurti, kryetari i Kuvendit, Glauk Konjufca, së bashku me anëtarë të kabinetit qeveritar dhe me ish-ambasadorin e OSBE-së Wiliam Walker, morën pjesë sot në ceremoninë përkujtimore me rastin e 25-vjetorit të Masakrës së Reçakut.
Siç njofton Zyra e Kryeministrit, në këtë ceremoni të organizuar nën patronatin e Zyrës së Kryeministrit, kryeministri Kurti, bëri homazhe dhe vendosi kurora me lule në kompleksin memorial në Reçak, në nderim të viktimave civile të masakruara nga forcat serbe, më 15 janar të vitit 1999.
“Me 15 janar, në një dimër jashtëzakonisht të ftohtë patë ndodhur ky krim makabër, ndërkaq varrimi i 45 civilëve ka ndodhur vetëm katër javë më vonë sepse ka pasur luftë të madhe për kufomat”, theksoi kryeministri Kurti.
Ai gjithashtu shtoi se janë edhe 11 ushtarë të Ushtrisë Çlirimtare të Kosovës (UÇK) që kanë rënë në betejë për mbrojtjen e trupave të masakruar nga Serbia dhe se ato katër javë tregojnë që Serbia është përpjekur ta deformojë të vërtetën e ta justifikojë krimin.
Në fund duke falënderuar ambasadorin Walker, kryeministri Kurti theksoi se në një moment vendimtar e historik për popullin kosovarë, “ambasadori Walker, foli të vërtetën dhe vetëm të vërtetën, atë që Serbia është përpjekur ta deformojë”.
“Kur ndodhi masakra e Reçakut, Ambasadori William Walker si udhëheqës i OSBE-së, në Kosovë, erdhi këtu tek fshatarët dhe e foli të vërtetën, tha kjo është masakër dhe është krim kundër njerëzimit. E dihet që e vërteta është armiku më i madh i diktatorëve dhe i shovinistëve, andaj edhe sot e kësaj dite Ambasadori William Walker, vazhdon të jetë ndërkombëtari më i sulmuar dhe më i urryer në Serbi ku vazhdon të dominojë një regjim autoritar me ç’rast ish-ministri i Informatave të asaj kohe sot është President i Serbisë”, shtoi Kurti.
Pas homazheve në Kompleksin Memorial në Reçak në kuadër të shënimit të 25-vjeorit të Masakrës së Reçakut, në Shtëpinë e Kulturës në Shtime u mbajt edhe ceremonia përkujtimore ku morën pjesë tre krerët e shtetit, ambasadori William Walker, Kryetari i Komunës së Shtimes, Qemajl Aliu e shumë përfaqësues të tjerë diplomatikë e të institucioneve vendore.
