Ministri i Drejtësisë i Maqedonisë së Veriut, Nikolla Tupançeski, ndodhet për një vizitë zyrtare në Zagreb, ku u takua me homologun e tij, ministrin e Drejtësisë dhe Administratës së Kroacisë, Ivan Malenica, transmeton Anadolu Agency (AA).
Sipas njoftimit të dërguar nga Ministria e Drejtësisë e Maqedonisë së Veriut, temat kryesore gjatë bisedës ishin forcimi i bashkëpunimit dypalësh në fushën e gjyqësorit, si dhe ngritja e kapaciteteve për zhvillimin e negociatave në kuadër të Kapitullit 23: Gjyqësori dhe të drejtat themelore.
Siç thuhet në njoftim, në takim u shkëmbyen mendime për çështje përmes të cilave Maqedonia e Veriut mund të nxjerrë përvoja praktike dhe të dobishme nga Kroacia, të rëndësishme në procesin e integrimit evropian.
“Kroacia është një shembull i mirë për t’u ndjekur për sa i përket përmbushjes së detyrimeve specifike në gjyqësor për anëtarësimin e vendit tonë në Bashkimin Evropian. Kapitulli 23 është një nga kapitujt më të gjerë dhe më kompleks, ndërsa shpejtësia dhe kohëzgjatja e negociatave në këtë fushë drejtpërdrejt ndikojnë në mbarëvajtjen e procesit të negociatave”, tha ministri Tupançeski.
Ministri kroat Ivan Malenica tha se në periudhën e ardhshme do të intensifikohet bashkëpunimi dhe dialogu mes dy vendeve në drejtim të gjetjes së zgjidhjeve të bazuara në vlerat evropiane.
Në takim u bisedua edhe për përvojën e Kroacisë në procesin e vetingut në sistemin gjyqësor, për luftimin e krimit të organizuar dhe korrupsionit, si dhe për zbatimin e marrëveshjeve dypalëshe mes dy vendeve. Ministrat Tupançeski dhe Malenica gjithashtu patën fjalime në Fakultetin Juridik në Zagreb.