Kryeministri i Izraelit, Yair Lapid, kërkoi mbështetje nga disa vende për të kundërshtuar votimin e muajit të ardhshëm në Asamblenë e Përgjithshme të Kombeve të Bashkuara për pushtimin e tokave palestineze nga Izraeli, transmeton Kosova Post.
Sipas një deklarate me shkrim nga Zyra e Shtypit e Kryeministrisë izraelite, Lapid ka dërguar një letër, ku u bën thirrje liderëve të më shumë se 50 vendeve që të përdorin ndikimin e tyre mbi qeverinë e Palestinës për të parandaluar votimin e rezolutës në Asamblenë e Përgjithshme të OKB-së, e cila i kërkon Gjykatës Ndërkombëtare të Drejtësisë (GJND) për të dhënë opinion rreth pushtimit të Palestinës nga Izraeli.
Në letrën e tij, Lapid theksoi se nëse përpjekja për të bllokuar votimin dështon, “Izraeli pret që miqtë e Izraelit të qëndrojnë në anën e Izraelit dhe të votojnë kundër rezolutës”.
“Ky vendim është rezultat i një përpjekjeje të përbashkët për të përjashtuar Izraelin, për të diskredituar shqetësimet tona legjitime të sigurisë dhe për të çlegjitimuar ekzistencën tonë”, tha kryeministri izraelit.
Duke argumentuar se statusi i “zonave të diskutueshme” (Bregu Perëndimor nën pushtimin izraelit) duhet t’i nënshtrohet negociatave të drejtpërdrejta midis Izraelit dhe qeverisë së Palestinës, Lapid pretendoi se “marrja e çështjes në Gjykatën Ndërkombëtare të Drejtësisë është në kundërshtim me parimin e negociatave të drejtpërdrejta të pranuar nga komuniteti ndërkombëtar dhe nga kjo do të përfitojnë ekstremistët”.
Thuhet se vendet ku u dërgua letra përfshijnë Britaninë, Francën, Kroacinë, Rumaninë, Bullgarinë, Holandën, Sllovakinë, Letoninë, Gjeorgjinë, Brazilin, Uruguain, Perunë dhe Vietnamin.
Çfarë kishte ndodhur?
Projektrezoluta, në të cilën Palestina kërkoi opinionin e Gjykatës Ndërkombëtare të Drejtësisë (GJND) për pushtimin izraelit dhe pasojat ligjore të krimeve të kryera, u miratua në votimin e mbajtur më 11 nëntor në Komitetin e Posaçëm Politik dhe të Dekolonizimit të Asamblesë së Përgjithshme të OKB-së.
Në votimin e zhvilluar në komision, projektligji u pranua me 98 vota pro dhe 17 kundër, ndërsa 52 vende abstenuan.
Në projektrezolutë, Gjykatës Ndërkombëtare të Drejtësisë i kërkohet të nxjerrë një opinion duke shpjeguar pasojat juridike të shkeljes së të drejtës së popullit palestinez për vetëvendosje nga Izraeli, pushtimit të gjatë dhe uzurpimit të tokave palestineze.
Projektligji pritet të nxirret në votim në Asamblenë e Përgjithshme të OKB-së muajin e ardhshëm./aa