Ministri i Shëndetësisë, Rifat Latifi vazhdon të qëndrojë në Shtetet e Bashkuara. Ai së fundmi atje u takua me kryeministrin Albin Kurti dhe së bashku shkuan në Kolegjin “New York Medicine College”, me seli në New York, aty ku sipas MSH-së u diskutua edhe mundësia e shkollimit të studentëve kosovarë atje.
Sipas njoftimit të Ministrisë Shëndetësisë, bëhet e ditur se “ata u takuan me drejtuesit e këtij institucioni, zv.Presidentin Prof. Dr. Salomon Amar, zv.Presidentin për Çështje Qeveritare, Robert Amler dhe zv.Presidentin e Lartë, Michael Newman”.
Ministri Latifi tha se ‘bashkë me përfaqësuesit e New York Medicine College diskutuan për mundësinë e bashkëpunimit në shumë projekte të ndryshme sa i përket transformimit të sistemit shëndetësor të Kosovës’, thuhet në njoftimin e MSH-së.
Ministria thotë se Latifi “theks të vecantë në këtë takim i dha edhe bashkëpunimit në menaxhimin e shëndetësisë dhe programet e shëndetit publik, arsimimit shëndetësor dhe trajnimit në fusha të ndryshme, si trauma dhe menaxhimi i katastrofave dhe emergjencave”
Tutje thuhet në njoftim se Ministri Latifi veçoi se pjesë e rëndësishme e këtij diskutimi me përfaqësusit e këtij Kolegji ishte edhe mundësia e bashkëpunimit në aspektin e shkollimit të studentëve nga Kosova, dhe në projektet e ndryshme hulumtuese-shkencore.
Ndërkaq, përfaqësuesit e kolegjit amerikan, sipas MSH-së, theksuan se janë të gatshëm për të bashkëpunuar në ato fusha ku Kosova dhe qytetarët e saj kanë interes për ta zhvilluar sistemin e shëndetësisë.
