Janë bërë afër dy muaj, prej kur disa nga anëtarët e Këshillit Mësimor Shkencor dhe pro Dekanët e Fakultetit Juridik në Universitetin e Mitrovicës, kanë dhënë dorëheqje nga pozitat e tyre, e krejt kjo siç merret vesh, si rezultat i parregullsive dhe situatave të krijuara nga dekani Agron Beka.
Si pasojë e këtyre dorëheqjeve, ky këshill nuk ka kuorum dhe nuk është funksional.
Sipas Gazetës Blic, kjo çështje është ngritur edhe në Këshillin Drejtues- si organi më i lartë drejtues i Universitetit të Mitrovicës.
“Në mbledhjen e fundit të këtij këshilli është marrë vendim që të shpallen zgjedhjet në këtë fakultet. Nga Komisioni Qendror i Zgjedhjeve në universitet janë përcaktuar edhe afatet e zgjedhjeve, por kryesuesi i Këshillit Drejtues Salem Lepaja nuk e ka nënshkruar ende vendimin që është marrë nga këshili me 7 vota për”, tha ky burim brenda Universitetit të Mitrovicës.
Sipas këtij burimi, kjo gjendje ka bërë që Fakulteti Juridik të mos ketë këshill, që e ka të drejtën të marë të gjitha vendimet lidhur me këtë fakultet.
“Universiteti është në prag të përgatitjes për konkurs, por pa këshill të fakultetit nuk mund të organizohet provimi pranues për studentët”, tha ky burim.
Ahmet Jashari, zëdhënës në Universitetin e Mitrovicës- Fakulteti Juridik, në një bisedë telefonike për GazetaBlic ka konfirmuar se Këshilli Drejtues në mbledhjen e fundit ka marrë vendim t’i shpall zgjedhjet në këtë fakultet, mirëpo, sipas tij, ky vendim akoma nuk është nënshkruar nga kryesuesi i Këshillit Drejtues Salem Lepaj.
I njëjti i ka thënë gazetës se të premten do të jetë mbledhja e radhës e këshillit, në të cilën përfundimisht do të merret vendimi.
“Në mbledhjen e fundit të këshillit drejtues është marr vendimi me i shpall zgjedhjet në Fakultetin Juridik, për shkak se anëtarët e këshillit të fakultetit dhe pro dekanët kanë dhënë dorëheqje prej pozitave të tyre dhe kjo e ka vështirësuar punën në fakultet. Por, në fund Këshilli Drejtues ka marr vendim me i shpall zgjedhjet. Sot mora vesh që ende nuk është nënshkruar prej kryesuesit të këshillit drejtues drafti që është përgatitur nga administrate dhe të premten mbahet mbledhja tjetër e këshillit ku përfundimisht merret vendim dhe presim të bëhet zgjidhje për Fakultetin Juridik”, deklaron ai.
E dekani i Fakulteti Juridik në Universitetin e Mitrovicës, Agron Beka e ka një version tjetër.
Sipas tij, dorëheqjet kanë ardhur si pasojë e sabotimit të tyre ndaj kërkesës së Këshillit Drejtues të Universitetit për zbatimin e Ligjshmërisë statutare që është dashur ta bëjë Këshilli i Fakultetit Juridik për pozitën e U.d.Prodekan për buxhet dhe financa që e ka zgjedhur Senati, pas propozimit të Këshillit të Fakultetit Juridik në kundërshtim me Statutin meqenëse personi i tillë ka vetëm master të përfunduar, ndërsa sipas Statutit duhet të ketë së paku thirrjen akademike profesor asistent.
E që, siç thekson ai, me këtë veprim të dorëhequrve nga Këshilli i Fakultetit Juridik, Universiteti është dëmtuar financiarisht mbi 40.000 euro.
Tutje ai thekson se rastin e ka proceduar edhe në organet e sistemit të drejtësisë.
Kurse, sa i përket regjistrimit të studenteve të rinj, ai thotë se janë bërë të gjitha përgatitjet e duhura dhe se nuk do të ketë asnjë ngecje në këtë drejtim.
“Sa i përket regjistrimit të studentëve ju njoftoj se kjo vendoset nga Senati jo nga Fakulteti Juridik, ndërsa unë si dekan i kam bërë parapërgatitjet e nevojshme me bashkëpunëtorët e mi në Fakultetin Jurdik dhe nivelin qendror për këtë proces, i cili sikurse deri tani do të jetë i suksesshëm’, ka theksuar ai.
Beka ka akuzuar “të dorëhequrit (disa janë) se duke abuzuar dhe mos zbatuar KËRKESAT DHE VENDIMET E KËSHILLIT DREJTUES TË UNIVERSITETIT (si instanca më e lartë qeverisëse në universitet) kanë shkelur rëndë Parimin e Ligjshmërisë, për të cilën janë njoftuar instancat e sistemit të drejtësisë dhe ndaj të cilëve do të merren masat adekuate ligjore”.