Komuna e Malishevës ka njoftuar se shkaku i reshjeve të shumta të shiut dhe vërshimeve, rruga që lidhë fshatin Rud të Malishevës me fshatin Sferkë të Klinës, është dëmtuar rëndë dhe është tërësisht e pakalueshme.
Fotografitë kanë nisur të bëhen virale edhe në rrjetin social facebook, ku ka nisur tallja nga ana e qytetarëve.
Realizimi i këtij projekti, që lidhë Komunën e Klinës me Komunën e Malishevës me rrugë të asfaltuar, është financuar nga Ministria e Infrastrukturës, por procedurat tenderuese janë udhëhequr nga Komuna e Malishevës.
Duke qenë se Komuna e Klinës mohoi se kontrata bazë iu takonte atyre mbi këtë projekt, Mirsad Dakaj, këshilltar i kryetarit të asaj komune, për klankosova.tv, ka dërguar një dokument në të cilin figurojnë detaje se si ishte tenderuar tërë projekti.
Aty thuhet se Komuna e Malishevës kishte lidhur kontratë në tetor 2019 me grupin e kompanive “REA” SH.P.K & “Euroasphalt” Sh.p.k.
Vlera e kontratës ka qenë: 267.270 euro dhe projekti ka përfunduar në prill të vitit 2020.
Në një përgjigjie paraprake për klankosova.tv, Artan Paçarizi, nga Zyra për Informim e Komunës së Malishevës, tregoi se ky projekt rrugor ishte i Ministrisë së Infrastrukturës.
Por ai pranoi se si komunë për zonën që i takon, kishin participuar me 40 mijë euro mjete të ndara për punime në këtë segment.
Nga Ministria e Infrastrukturës deklaruan se ata kryen vetëm financimin e projektit, por që prokurimi iu takon komunave në bazë të kontratës bazë, ku përfshin dhe kompetencën e mbikëqyrjes dhe mirëmbajtjes.