Ministri i Mbrojtjes Armend Mehaj ka pritur sot në takim zëvendësambasadorin e Holandës në Prishtinë Peter van der Bloemen, me të cilin diskutoi për thellimin e bashkëpunimit Kosovë-Holandë në fushën e mbrojtjes, si dhe zhvillimet në Evropë pas agresionit ushtarak rus në Ukrainë, transmeton KosovaPost.
Mehaj me këtë rast ka thënë se Holanda, si një nga vendet themeluese të NATO-s, është ndër partnerët e rëndësishëm të Kosovës në fushën e mbrojtjes dhe sigurisë.
“Diskutuam për thellimin e bashkëpunimit bilateral në mes dy ministrive të mbrojtjes si dhe koordinimin sa më të mirë për realizimin e aktiviteteve të planifikuara për vitin 2022, sipas Planit Bilateral që nënshkruam sot”, ka shkruar Mehaj në Facebook.
Ai ka bërë të ditur se nga zëvendësmabsadori Van der Bloemen ka kërkuar mbështetjen e Holandës për anëtarësim të përshpejtuar të Kosovës në NATO.
Postimi i plotë:
Holanda, si një nga vendet themeluese të NATO-s, është ndër partnerët tanë shumë të rëndësishëm edhe në fushën e mbrojtjes dhe sigurisë.
Sot prita në takim Zv. Ambasadorin e Holandës në Kosovë, Peter van der Bloemen, me të cilin diskutuam për zhvillimet aktuale gjeopolitike në Evropë pas agresionit ushtarak të Rusisë në Ukrainë, si dhe ndikimit të tyre në aspektin e sigurisë dhe stabilitetit në rajon dhe më gjerë.
Gjithashtu diskutuam për thellimin e bashkëpunimit bilateral në mes dy ministrive të mbrojtjes si dhe koordinimin sa më të mirë për realizimin e aktiviteteve të planifikuara për vitin 2022, sipas Planit Bilateral që nënshkruam sot.
Ndër të tjera, nga Zv. Ambasadori Van der Bloemen kërkova mbështetjen e Holandës, si një ndër vendet themeluese të Aleancës Veriatlantike, në synimin tonë për anëtarësim të përshpejtuar të Republikës së Kosovës në NATO.