Ministrja e Drejtisisë Albulena Haxhiu në mbledhjen e mbajtur sot, prezantoi para Qeverisë shqyrtimin e draft koncept-dokumentit për çështjen e pasurisë së fituar në mënyrë të pajustifikueshme, shkruan Kosova Post.
E krahas prezantimit të këtij drafti, Qeveria ka votuar me shumicën e votave për çështjen e pasurisë së fituar në mënyrë të pajustifikueshme.
“Ministria e Drejtësisë ka iniciuar koncept dokumentin për pasurinë e fituar në mënyrë të pajustifikueshme, mangësitë dhe problemet që ekzistojnë në këtë fushë. MD pas miratimit të këtij koncept-dokumenti do të hartojë projektligjin që do të përmbajë rregullimin e koncepteve për hetimin e pasurisë së pajustifikueshme që ju takon personave të dyshuar. Synohet që të themelohet një agjenci e pavarur e cila inicion procedurën ndaj personave të dyshuar që kanë fituar pasurinë në mënyrë të jashtëligjshme”, ka thënë ajo.
“Nuk kërkohet që njëherë të dënohet personi me aktgjykim dënues e pastaj të fillojnë procedurat e konfiskimit ndaj tij. Ky ligj do të gjejë zbatim që para shpalljes së pavarësisë. Ky ligj do të mbrojë interesin publik, në drejtim të asaj se pasuria publike mbetet e qytetarëve”, shtoi ajo.
Për këtë koncept dokument ka folur edhe kryeministri i Kosovës, Albin Kurti.
“Draft koncept dokumenti trajton tri opsione kryesore, status quo-në pa asnjë ndryshim, përmirësimi i zbatimit të krijimit ligjore pa ndryshime legjislative, opsion që ka adresuar probleme po e ka të pamundur që të ofrojë bazë të re ligjore, dhe së fundmi hartimi i ligjit të ri për konfiskimin e pasurisë. Pas analizës së bërë, opsioni për miratimin e ligjit vlerësohet se më i përshtatshëm për t’i adresuar problematikat e identifikuara”, ka thënë ai.