Vendimi i fundit i Gjykatës Kushtetuese, i cili nuk lejon kandidimin e personave të dënuar, ka vënë në pikpyetje kandidimin e Albin Kurtit në zgjedhjet e 14 shkurtit.
Por njohësit e çështjeve politike, kanë mendime të ndara sa i përket efektit që mund të krijojë tek votuesit dhe elektorati, moskandidmi i tij.
Analisti, Dorajet Imeri, ka theksuar se një moskandidim i mundshëm i Kurtit në zgjedhjet e 14 shkurtit mund ta rritë mbështetjen për VV-në.
Imeri thotë se VV-ja mund ta përdorë si argument në fushatë, se me një veprim të tillë po tentohet pengimi i Kurtit për të ardhur në pushtet.
“Moskandidimi i z. Kurtit në këto zgjedhje, sigurisht se do të krijojë një precedan jo fort të mirë, për faktin se Gjykata nuk ka pasur për të trajtuar rastet e denimit të formës se si e ka ai. Kandidimi i tij mbetet të shihet, por ne duhet t’i mëndojmë dy skenare, e para ku ai mund të kandidojë, për faktin se KQZ, pasi të ketë marrë konfirmimin nga institucionet përgjegjëse të drejtësisë, për verifikimin e kandidatëve në lista, i mundëson kandidimin dhe skenari tjetër që është shumë i përfoluar, është pamundësimi i kandidimit të tij. Kjo krijon një situatë tjetër, efektet e të cilës do të thoja vetëm sa do ta mobilizojnë edhe më tej elektoratin e VV-se, pasi kjo e fundit do ta përdorë si përligjie të kauzës së tyre politike, duke pretenduar se nuk janë duke u zgjedhur format për të ndaluar ardhjen në pushtet të z. Kurtit. Pra konideroj që moskandidimi i tij eventual do ta rritë mbështetjen për VV-në”, ka thënë Imeri
Ndërsa njohësi i çështjeve politike, Nexhmedin Spahiju, ndan mendim të kundërt.
Spahiju thekson se nëse Kurti nuk arrin të kandidojë në zgjedhje, VV-ja do të penalizohet.
“Do të penalizohet. Mesazhi te publiku do të jetë se ai nuk ka akoma bekimin amerikan”, ka thënë Spahiu.
Por edhe analisti Shemsi Jashari ka thënë se nëse Kurtit nuk i lejohet kandidimi në zgjedhje, përkrahja për VV-në do të shtohet. Ai thotë se VV-ja do ta përdorë në favor të vetin këtë fakt duke u ‘viktimizuar’.
“Lëvizja Vetëvendosje do të përdorë të gjitha mjetet për të hyrë në garë si bartës i listës z.Kurti dhe nëse kjo nuk do ti mundësohet si pasojë e aktgjykimit të gjykatës Kushtetuese LVV do ta shfrytëzoj në favor të vetin duke u viktimizuar dhe prezentuar si të qëllimshme për ta penguar z.Kurti të bëhet pjesë e garës për deputet, çka do të shtoj përkrahjen për LVV dhe mendoj se më shumë do të marr vota nëse nuk hynë garë sesa po të hynte si bartës i listës. Është dëshmuar tashmë se votuesi është i ndjeshëm ndaj “viktimës” dhe ka prirje për ta mbështetur më shumë” tha Jashari për Gazeta Blic.
Pas vendimit të Gjykatës Kushtetuese, UD. së presidentit, Vjosa Osmani , ka shpërndarë parlamentin duke shpallë zgjedhjet e përgjithshme.Zgjedhjet e përgjithshme pritet të mbahen me 14 shkurt
