Një ditë para fillimit të vitit shkollor, Ministrja e Arsimit Arbërie Nagavci, ka njoftuar opinionin publik për përgatitjet që i ka bërë institucioni që ajo e drejton, për fillimin e këtij procesi të rëndësishëm, transmeton Kosova Post.
Në situatë pandemie, Nagavci ka bërë të ditur se mbi 90% e mësimdhënësve janë vaksinuar.
Për këto informacione, ajo e ka shfrytëzuar llogarinë e saj në rrjetin social Facebook.
Ky është postimi i saj i plotë:
Nesër fillon viti i ri shkollor.
Gjatë gjithë kësaj kohe, kam vizituar shumë shkolla dhe kam qenë në kontakt të vazhdueshëm me drejtues shkollash, mësues e prindër. Ndonëse situata me pandeminë na ka sjellë në një gjendje të vështirë e me shumë sfida, janë bërë përgatitjet e duhura për të filluar vitin e ri shkollor.
Mbi 90% e mësimdhënësve dhe stafit tjetër që punon në shkolla janë vaksinuar. Më shumë se 65% prej tyre me të dy dozat.
Përkundër progresit në vaksinimin e popullsisë, e në veçanti të punonjësve të arsimit, ky vit shkollor mund të jetë shumë sfidues. Prandaj është e domosdoshme të respektohen masat mbrojtëse të rekomanduara nga profesionistët shëndetësor.
Kjo është mënyra më e mirë për të vënë pandeminë nën kontroll, duke i kontribuar mbarëvajtjes së procesit mësimor dhe ruajtjes së shëndetit publik.
Mësuesit e drejtuesit e shkollave kanë shumë punë e përgjegjësi, por jam e bindur se angazhimi dhe kujdesi i tyre nuk do të mungojë. Vaksinimi, respektimi i masave si dhe bashkëpunimi në të gjitha nivelet përfshirë edhe prindërit, do të na mundësojë një vit të suksesshëm shkollor.
Më shumë të dhëna në faqen më poshtë.
