Dy persona në mënyrë vullnetare kanë shpërndarë ujë në komunën e Prizrenit, për të gjithë kalimtarët, këtë e kanë bërë si pasojë e motit të nxehtë që është prezent këto ditë.
Dy qytetarë në Komunën e Prizrenit, kanë dalë për të shpërndarë ujë për kalimtarët e rastit në lagjen “Bazhdarhane”.
Kjo si pasojë, e temperaturës së lartë të motit në Kosovë.
Ndërkaq në lidhje me temperaturat e larta, Ministria e Shëndetësisë kishte bërë thirrje sidomos për moshat e vjetra që t’i shmangen daljes sidomos gjatë ditës kur edhe është piku i nxehtit.
Pesë ditët e ardhshme nga dy korriku deri më shtatë korrik, sipas parashikimeve të motit do të ketë temperatura të larta, të cilat mund të shkojnë deri mbi 30 gradë celsius. Kurse nga data tetë deri më 11 korrik, temperaturat pritet të kenë rënie.
Sipas Institutit Kombëtar të Shëndetësisë Publike të Kosovës (IKSHPK), Temperaturat e larta që mbretërojnë në sezonin e verës ndikojnë negativisht në organizmin e njeriut sidmos te të moshuarit.
Ekspozimi i gjatë në temperatura të larta, mund të shkaktojë çrregullime në organizëm, sic është dehidrimi, ngërcet, vjelljet, çrregullimet diarreike, skuqjet dhe djegiet në masë të madhe të lëkurës.
Disa nga këshillat e IKSHPK-së janë:
Personat e moshuar asesi nuk duhet të ekspozohen në rrezet e diellit në intervalin kohor prej orës 10.00-17.00 , sidomos jo të moshuarit me sëmundje të zemrës ose ata me diabet;
Gjatë daljes nga shtëpia të moshuarit detyrimisht duhet ta mbrojnë kokën me kapelë ose shall; rrobat duhet të jenë të holla, komode, prej liri ose pambuku dhe me ngjyra të çelta;
Është e domosdoshme marrja e 2 litrave lëngje gjatë ditës, qoftë si 8 gota ujë ose në formë supe ose qaji; po ashtu duhet anashkaluar ushqimin e fërguar, shumë të njelmët ose të ëmbël ose me mëlmesa të shumta, ndërsa duhet marrë shumë pemë dhe perime sezonale;
Përveç këshillave të marra nga mjeku për përdorimin e barnave, tek të moshuarit është e domosdoshme matja më e shpeshtë e tensionit arterial;
Paraqitja e kokëdhembjes, mundimit, marramendjes dhe dehidrimit, tharjes së gojës dhe lëkurës, janë shenja alarmante për të moshuarin, sidomos kur është i sëmurë dhe ka paaftësi funksionale; atëherë doemos i sëmuri geriatrik duhet të lajmërohet tek mjeku i tij familjar ose në qendrën më të afërt emergjente;
Anëtarët e familjes, miqtë, fqinjët dhe anëtarët e OJQ-ve të cilët kujdesen për të moshuarit gjatë muajve të nxehtë të verës duhet doemos më shpesh të kontaktojnë me të moshuarit, e në raste të paaftësive funksionale edhe disa herë gjatë ditës;
Në rast se del jashtë shtëpisë/banesës ku jeton, i moshuari duhet detyrimisht të bartë me vete të dhënat elementare, emrin dhe mbiemrin, vitin e lindjes, adresën e banimit, numrin e telefonit të personit kontaktues, i cili mund të kontaktohet lidhur me këtë person të moshuar;
Më e rëndësishmja është mirëmbajtja e higjienës personale dhe asaj të ambientit të të moshuarit, si dhe mbikëqyrja e përdorimit të barnave në mënyrë të rregullt;
Është i domosdoshëm aktiviteti fizik dhe psikik i të moshuarit, sidomos ecja e vazhdueshme në orët e para të mëngjesit ose në mbrëmje, qëndrimi sa më i gjatë në natyrë (park, shëtitore etj).
Nëse i moshuari ka vështirësi për të lëvizur për shkak të pamjaftueshmërive funksionale, atëherë duhet bërë ajrosjen shumëorëshe të hapësirave ku qëndron i moshuari./dukagjini.com
