Të dielën qytetarët e 21 komunave të Kosovës do t’i drejtohen edhe njëherë kutive të votimit.
Kjo, pasi që nga 38 komuna, 21 prej tyre kanë shkuar në balotazh dhe 17 sosh kanë marrë epilog në raundin e parë, shkruan lajmi.net.
Fokusi kryesor në këto zgjedhje do të jetë tek 4 kryeqendrat në të cilat asnjë kandidat s’arriti t’i mbledhë 50 përqind të votave.
Prishtina është gara kryesore ku kandidati i Lidhjes Demokratike të Kosovës Përparim Rama dhe ai i Lëvizjes Vetëvendosje Arben Vitia garojnë për të udhëhequr kryeqytetin në 4 vitet e ardhshme.
Po ashtu, komunë në fokus do të jetë edhe Prizreni. Në këtë komunë do të garojë VV-ja me Mytaher Haskuka, derisa PDK-ja në garë do të jetë me Shaqir Totajn.
Gjilani do të zhvillojë gjithashtu nesër një garë interesante pasi në raundin e parë kandidati i LDK-së, Lutfi Haziri dhe ai i VV-së Alban Hyseni patën rezultat të ngushtë.
Në Gjakovë, Gjini do të tentojë të mbajë karrigen e të parit të Gjakovës edhe për një mandat tjetër në garën ndaj Mimoza Kusarit që tenton ta rikthejë besimin e humbur para 4 vitesh nga gjakovarët.
