Një person u vra dhe dy të tjerë u plagosën dje në Mitrovicë. Si pasojë e të shtënave me armë ngjarja e djeshme tragjike shokoi gjithë vendin.
Të dyshuarit për vrasje dhe plagosje në këtë rast i është shqiptuar një muaj paraburgim.
Kjo gjë është bërë e ditur në njoftimin e gjykatës, ku theksohet se në seancën dëgjimore për caktimin e masës së paraburgimit është aprovuar kërkesa e Prokurorisë Themelore në Mitrovicë dhe të dyshuarit i është caktuar paraburgim prej një muaji.
Njoftimi i plotë:
Ditën e djeshme në Mitrovicë ka ndodhur një vrasje në Tregun e Gjelbër të qytetit, ku si pasojë e një konflikti të çastit një person ka mbetur i vrarë dhe dy të tjerë janë plagosur, ndërkaq i dyshuari për këtë rast është ndaluar me urdhër të prokurorit.
Sot, me datë 18 prill 2021, Prokuroria Themelore në Mitrovicë, Departamenti i Krimeve të Rënda, ka kërkuar nga Gjykata Themelore në Mitrovicë, caktimin e paraburgimit për të ndaluarin Sh.A., pasi që dyshohet se ka kryer veprën penale “Vrasja e rëndë” nga neni 173 i Kodit Penal të Republikës së Kosovës.
Në seancën dëgjimore për caktimin e masës së paraburgimit, të mbajtur para gjyqtarit të procedurës paraprake në Gjykatën Themelore në Mitrovicë, është aprovuar kërkesa e Prokurorisë Themelore në Mitrovicë, dhe të dyshuarit i është caktuar masa e paraburgimit prej një (1) muaji.